Ministrja e Mbrojtjes, Olta Xhaçka i është pvrgjigjur presidentit Ilir Meta lidhur me shqetësimin e tij për tërmetet.
Në një letër të publikuar për mediat, ministrja shprehet se parashikimi i lëkundjeve sizmike është përtej mundësive të shkencës.
“Pas konsultimeve edhe me IGJEUM, parashikimi i tyre është i pamundur. Sizmiologu Tsentelis e përgënjeshtroi lajmin që u bë shkas për shqetësimin tuaj. Qeveria dhe Ministria e Mbrojtjes ka vëmendjen maksimale ndaj fatkeqësive natyrore” – shkruan ministrja.
Më tej Xhaçka vijon duke u shprehur se qeveria është më e përgatitur se kurrë në këto 30 vite për t’u përballur me emergjencat. Ajo thekson se kapacitetet reaguese janë sot shumë më të mëdha si dhe ekziston një profesionalizm i jashtëzakonshëm.
“Koordinimi institucional është shumë më efikas se çka qenë ndonjëherë. Mënyra sesi përballuam tërmetin në Korçë janë prova më domethënëse e seriozitetit të përgatitjeve tona. Shprehja më e qartë e seriozitetit të punës sonë është ligji “Për Mbrojtjen Civile” i cili po pret dekretimin nga ana juaj” – thotë Olta Xhaçka.
Sipas saj, ligji është asistuar nga ekspertë vendas e të huaj dhe e transformon qasjen ndaj emergjencave.
“Ligji “Për Mbrojtjen Civile” zhvendos fokusin nga reagimi, tek parapërgatitja, parandalimi e zvogëlimi i riskut.. Dekretoni ligjin, jepni një kontribut real në përgatitjen e vendit për t’u përballur me fatkeqësitë natyrore” – përfundon ministrja.
/javanews/a.r
