Partia Socialiste e Shqipërisë vijon fushatën për zgjedhjet lokale të 30 Qershorit, që shprehet e vendosur se do të zhvillohen, pavarësisht dekretit të Presidentit dhe bojkotit të opozitës. Socialistët po zhvillojnë takime me qytetarët në cdo cep të vendit, madje edhe në kishë, sikur ka qenë rasti i kryetarit të bashkisë së Tepelenës, Tërmet Peçi. Ai rikandidon për një tjetër mandat, ndërsa ka publikuar fotot nga takimi që ka bërë në fshatin Lekël në shtëpinë e Zotit. Në një postim rrjetet sociale, Tërmet Peçi sqaron se përse e ka mbajtur takimin në kishën e fshatit me banorët dhe jo në një vend tjetër.
“Të flasësh me Lekëliot për historinë, traditën, njerëzit, me siguri do duheshin ditë të tëra sepse padyshim është fshati më historik në ish- rrethin e Tepelenës. E nisëm bisedën në kishën e fshatit. Një traditë që i shoqëron në shekuj, mbledhjet dhe kuvendimet e Lekëliotve. Kjo për faktin se fjala e lënë në vend të shenjtë, duhet patjetër të marrë udhë e të bëhet realitet…
Aty kanë lindur njerëz të mëdhenj, si gjenerali më besnik i i Ali Pashës, Thanas Vaja e Janko Poga. Bezhanajt, themeluesit e bankës së parë shqiptare më 1831 në Vlorë. Rilindasi Anastas Byku e Theodhos Llukani. Simboli i arsimit kombëtar Thoma Papapano e mjaft të tjerë njerëz të sukseshëm, të cilët realisht të krijojnë bindjen se Lekli i 7 – mëhallëve dhe 7 kishave, dhe me një kala 3000 vjeçare, është një djep për kulturën e zonës tonë” shkruan ai.
