Presidenti amerikan Donald Trump ka anuluar takimin e planifikuar me udhëheqësin e Koresë së Veriut, Kim Jong-un, duke thënë se është i papërshtatshëm në këtë moment.
Këtë, ai e ka njoftuar përmes Twitterit, edhe pse më herët kishte konfirmuar se takimi historik mes një presidenti në detyrë të Shteteve të Bashkuara me një udhëheqës koreano-verior do të mbahej në Singapor më 12 qershor.
Në një letër të publikuar nga Shtëpia e Bardhë, ai thotë se mezi pret të takohet me Kimin në një ditë të afërt, e aty shpjegon edhe arsyet e këtij anulimi.
Ndër të tjera Donald Trump i shkruan liderit koreano-verior: “Mjerisht, duke u bazuar në armiqësinë e madhe dhe të hapur të shfaqur në deklaratën tuaj më të fundit, unë mendoj se është e papërshtatshme, në këtë kohë, që të ketë këtë takim të planifikuar”.
Gjithashtu Trump shkruan se: “Koreano-veriorët flasin për aftësitë e tyre bërthamore, por armët tona janë aq masive dhe të fuqishme sa që i lutem Zotit që asnjëherë të mos kemi nevojë që t’i përdorim”.
/javanews/b.d
