Po luhej minuta e dytë e ndeshjes së shumë pritur mes Përfaqësueses së Kosovës dhe Kombëtares shqiptare kur 25 mijë tifozë në shkallët e stadiumit u shtangën pas lëndimit të mbrojtësit Ilir Berisha.
Anëtari i Përfaqësueses së Kosovës u detyrua të zëvendësohet për t’i kryer vizitat mjekësore, vizita që i dhanë lajmin se do të jetë tre muaj jashtë fushave të blerta.
Mirëpo gjithmonë ekziston një zgjidhje dhe këtë zgjidhje Ilir Berisha e gjeti në Beograd, duke vizituar mjeken Marijana Kovaçeviç.
Berisha nuk ishte lojtari i vetëm që kërkoi ndihmë tek Mariana, pasi ajo më parë i ka shëruar edhe yjet e futbollit si brazilianin Neymar, Wayne Rooney, Arda Turan, Diego Costën, Robin Van Persien, Alexis Sanchez si dhe futbollistët shqiptarë Hamdi Salihi e Liridon Latifi.
Pikërisht Latifi ishte ai që i propozoi Ilirit të shkonte tek Marijana për tu shëruar, ndërsa në një intervistë për Telegrafin, mbrojtësi i Përfaqësueses së Kosovës tregon për përvojën e tij në Beograd.
“Një javë më parë mjekët më thanë se do të jem jashtë fushe për tre muaj dhe kam ecur me shtaga, mirëpo sot jam i gatshëm 100% për ndeshje dhe kjo është gjëja më e mira për mua”, shprehet fillimisht Iliri.
“Pas lëndimit të pësuar kam kontaktuar me Liridon Latifin i cili më ka propozuar të shkoj në Beograd tek Marijana Kovaçeviç dhe vendosa ta provoj fatin”.
“Vetëm pas terapisë së parë që kam bërë kam mundur të eci pa ndihmën e shtagave, ndërsa gjithsej i kam bërë gjashtë orë terapi”, tregon Iliri për Telegrafin.
“Për mua nuk ishte ndonjë problem i madh nacionaliteti i saj, por as asaj nuk i interesonte nacionaliteti im, pasi të dy kishim nevojë për njëri-tjetrin, ajo për të holla sepse e ka punë këtë dhe nuk dëshironte të dështonte unë për shërim, dhe kjo ka qenë e gjitha”.
“Gjatë kohë që kam qëndruar në Beograd, ka ardhur edhe Andi Lila pas lëndimit që pësoi në miqësoren ndaj Gjeorgjisë, ndërsa edhe ai ishte në rrugë të mirë për tu shëruar”, vazhdon tutje Iliri.
Ish-mbrojtësi i Prishtinës dhe Orebros, ka falënderuar Federatën e Futbollit të Kosovës për ndihmën e madhe dhe përkrahjen që i ka dhënë.
“Dua ta falënderoj FFK-në, që më ka përkrahur në të gjitha mënyrat për këtë shërim. Gjithashtu me mua ka qenë edhe Agron Selimi si organizator i ndeshjes Kosovë – Shqipëri, pasi ka shprehur gatishmërinë për të më qëndruar afër. Mbështetja e FFK-së, familjarëve, miqve dhe tifozëve më ka ndihmuar jashtëzakonisht shumë”, u shpreh Iliri i cili për fund tregon se Marijana kishte përdorur disa metoda elektro bio magnetike për shërim.
24-vjeçari gjatë ditës së sotme do të rikthehet në Suedi, ku është duke shqyrtuar disa oferta që kanë ardhur në drejtim të tij nga skuadrat vendase por edhe nga disa kampionate tjera evropiane si Turqia, Gjermania dhe Zvicra.
/Telegrafi/
