Dy ditë pas ngjarjes së rëndë të ndodhur mbrëmjen e 25 nëntorin në një lokal me muzikë live në aksin rrugor Korçë-Dishnicë, ku dy persona kanë qëlluar me armë zjarri, policia ka bërë të mundur arrestimin e njërit prej tyre. Sipas policisë së Korçës, specialistët e Sektorit për Krimet e Rënda bënë kapjen dhe arrestimin e shtetasit G.T, 17 vjeç, si dhe u shpall në kërkim 28-vjeçari A.S, të dy banues në Korçë.
Të dy këta persona, akuzohen për veprën penale “Vrasja në rrethana të tjera cilësuese, mbetur në tentativë, kryer në bashkëpunim”.
“Dyshohet se të dy këta shtetas në bashkëpunim me shtetasit A.Qiraxhi dhe A.Babani, banues në Korçë, më datë 25.11.2017, për motive të dobëta, kanë tentuar të vrasin, me armë zjarri dhe me sende të forta shtetasit A.L dhe A.K, të dy banues në Korçë”, thuhet në njoftimin e policisë.
NJOFTIMI I POLICISE PER NGJARJEN
Më datë 25.11.2017, në aksin rrugor Korçë-Dishnicë, jemi njoftuar së në drejtim të një lokali me muzikë live, është qëlluar me armë zjarri. Menjëherë në vendngjarje kanë shkuar shërbimet e Policisë.
Nga verifikimet e kryera rezulton se shtetasit A.Qiraxhi, 23 vjeç dhe shtetasi A.Babani, 18 vjeç, së bashku me disa shtetas të tjerë bashkëpunëtorë të dyshuar të tyre, janë pozicionuar me dy automjete përpara lokalit dhe kanë goditur me dy armë zjarri tip kallashnikov dhe pistoletë, në drejtim të këtij të fundit.
Këta shtetas më pas kanë hyrë në lokal dhe kanë goditur me mjet të mprehtë shtetasin A.K dhe kanë tentuar të vrasin me armë zjarri shtetasin A.L, (pronari dhe administratori i lokalit). Shtetasi A.K, ka marrë mjekim në Spitalin e Korçës dhe nuk ka probleme për jetën. Motivi i kësaj ngjarje dyshohet të ketë qenë një konflikt i vjetër për motive të dobëta, ndodhur midis këtyre personave.
a.ç
