Policia Kufitare ka goditur një rast të trafikimit të veprave të artit. Sipas asaj që bën të ditur policia bëhet fjalë për 10 piktura me vlerë rreth 25 000 Euro.
Ndërkohë si pasojë ka rënë në pranga drejtuesi i furgonit në të cilën u gjetën pikturat si dhe janë shpallur në kërkim dy persona të tjerë, të dyshuar si bashkëpunëtorë në këtë rast.
“Nga kontrollet në këtë mjet, janë gjetur 10 vepra arti (piktura), të padeklaruara, për të cilat ky shtetas nuk dispononte asnjë dokument që vërtetonte origjinën e tyre apo pronësinë mbi to”, njofton ndër të tjera policia.
Materialet procedurale i kaluan Prokurorisë së Durrësit, për veprime të mëtejshme, për veprën penale “Trafikimi i veprave të artit dhe kulturës”, kryer në bashkëpunim.
“Policia Kufitare godet një rast të tentativës për trafikim të veprave të artit. Sekuestrohen 10 piktura me vlerë rreth 25 000 euro. Arrestohet në flagrancë drejtuesi i furgonit ku u gjetën pikturat.
Identifikohen dhe shpallen në kërkim 2 shtetas, të dyshuar si bashkëpunëtorë në këtë rast. Në vijim të punës së bazuar në analizën e riskut, të kryer nga Policia Kufitare e PKK Port Durrës, në hyrje/dalje të vendit, me qëllim parandalimin dhe goditjen e krimeve në kufi, në dalje të Shqipërisë, është kaluar në vijë të dytë, për kontroll të detajuar, furgoni me drejtues shtetasin K. Q.
Nga kontrollet në këtë mjet, janë gjetur 10 vepra arti (piktura), të padeklaruara, për të cilat ky shtetas nuk dispononte asnjë dokument që vërtetonte origjinën e tyre apo pronësinë mbi to. Në vijim të veprimeve procedurale për rastin, u arrestua në flagrancë shtetasi K. Q., 37 vjeç, banues në Elbasan.Gjithashtu, u shpallën në kërkim shtetasit Q. H., 25 vjeç, banues në Fier dhe G. N., 53 vjeç, banues në Durrës, pasi nga hetimet dyshohen si bashkëpunëtorë të shtetasit K. Q., për trafikimin e pikturave. Vijon puna për kapjen e tyre dhe për dokumentimin e plotë të këtij rasti”, thuhet në njoftimin e policisë.
