Me një palë pantallona të zeza deri në kyçin e këmbës, atlete të bardha, një bluzë të zezë dhe një xhaketë ushtarake. Këto rroba veshi një mbrëmje dy vite më parë, 20-vjeçarja Martina Evatore, kur një burrë në Padova tentoi ta përdhunonte.
Me të njëjtën veshje Martina Evatore zgjodhi të parakalonte në pasarelë të shtunën e kaluar në konkursin ‘Miss Venice Beach’ në Jesolo. Ajo zgjodhi këtë veshje për të dhënë mesazhin e fortë ‘Nuk janë rrobat ato që nxisin përdhunimin’.
“Nëse shkon e veshur kështu, e kërkon”, i kishte thënë një “shoqe” disa javë më parë. Dhe kështu Martina donte të demonstronte dhe t’u thoshte të gjithëve nga skena se jo, “nuk është veshja ajo që nxit dhunë”, se nuk ka dallim mes një minifundi dhe një palë pantallonash të gjata, se përdhunimi nuk është kurrë faj si vishet një vajzë, çfarë vesh një vajzë, se nuk ka fustan që mund të bëhet alibi për të justifikuar një sulm seksual.
Dy vjet më parë, Martina Evatore po ecte me të njëjtën veshje, kur një burrë tentoi ta përdhunonte. Martina bërtiti, disa kalimtarë e dëgjuan dhe arritën ta shpëtonin. Por dhuna mbetet dhunë që nuk harrohet, e cila e bëri edhe atë të humbiste dy vite shkolle nga tronditja, frika.
Në pasarelë, Martina Evatore vendosi të shfryjë zemërimin e saj:
“Nuk është veshja që nxit dhunën”, tha ajo në mikrofon.
g.kosovari
