Në një seri postimesh të realizuara në mbrëmje vonë në llogarinë e tij në Truth Social, presidenti amerikan Donald Trump ka hedhur akuza të ndryshme përkundrejt disa kundërshtarëve të tij politikë.
Në më shumë se 24 postime, përfshirë video dhe imazhe të krijuara nga inteligjenca artificiale, ajo që ra më shumë në sy ishte video e montuar me AI që tregon ish-presidentin Barack Obama duke u arrestuar nga agjentë të FBI-së në Zyrën Ovale dhe një foto, po të rremë të tij, ku shihet i veshur me një uniformë burgu ngjyrë portokalli.
Trump po ashtu i ka bërë thirrje ish-presidentit Obama që duhet të “marrë avokat”, pasi e akuzon atë për përfshirje në një tentativë për “grusht të butë shteti”, me qëllim rrëzimin e tij në 2016.
Mes qëndrimeve kritike për zyrtarët e administratës Obama dhe fillimit të hetimeve nga FBI për ndërhyrjen ruse në zgjedhjet e vitit 2016, Trump përsëriti akuzat e tij të kahershme për të ashtuquajturin “mashtrimi rus”, që lidhet me ndërhyrjen nga Moska në procesin për zgjedhjen e Presidentit.
“Ishte informacion i fabrikuar i inteligjencës për të përmbushur qëllimet politike të Presidentit Obama”, thuhet në një nga videot e publikuara nga Trump, ku ish-paraardhësi i tij shihet me kostum burgu.
Ndër postimet e tjera, Trump ndau edhe video të drejtoreshës së Inteligjencës Kombëtare, Tulsi Gabbard, e cila ka kërkuar ndjekje penale për Obamën për rolin e tij të supozuar në hetimet mbi ndërhyrjen ruse në zgjedhje.
Gabbard, në një intervistë me Fox News, pretendoi se “inteligjenca ishte politizuar në nivelet më të larta nën drejtimin e një presidenti në detyrë”.
Trump gjithashtu sulmoi senatorin demokrat Adam Schiff, gazetën Wall Street Journal, dhe ekipin e futbollit amerikan Washington Commanders. Ai kërkoi që emri i skuadrës të rikthehet në “Redskins”, emër që u braktis në vitin 2020 për shkak të kritikave se ishte ofendues për popujt indigjenë.
Po ashtu, ai kërkoi që ekipi i bejzbollit Cleveland Guardians të rikthehet në “Indians”, duke pretenduar se “populli i madh indian dëshiron këtë ndryshim”. Trump e përshkroi këtë lëvizje si “Make Indians Great Again” ose shkurt “MIGA”.
