Argita Malltezi, vajza e ish-kryeministrit Sali Berisha dhe bashkëshorte e Jamarbër Malltezit, ka vënë në pikëpyetje standarded e Prokurorisë së Posaçme SPAK, pasi është thirrur për tu marrë në pyetje lidhur me një kallëzim që ish-kryetarja e GJKKO-së, Irena Gjoka, ka bërë ndaj saj.
“Është një tentativë për të larë fytyrën e Irena Gjokës, nuk cenonte hetimin nëse Spak jepte një përgjigje për publikun. U thirra si person që mund të ketë dijeni”, përmendi Malltezi pas daljes së saj nga SPAK.
Sipas saj, Prokuroria e Posaçme ka mundësi ta zgjerojë objektin e hetimin.
Lidhur me rastin, ka lidhje me kallzimin e bërë në SPAK, më 19 tetor nga ish-kryetarja e GJKKO, Irena Gjoka, njëherazi edhe gjyqtarja që caktoi masat e sigurisë “arrest në shtëpi” për ish-kryeministrin Sali Berisha dhe “arrest në burg” për dhëndrin e tij, Jamarbër Malltezi.
Gjoka ka kërkuar nga SPAK që të hetojnë deklaratat e Argita Berishës e cila e akuzon gjyqtaren se është filmuar duke i kërkuar 500 mijë euro një ish-eksponenti të PS.
Gjyqtarja Gjoka kërkoi hetime të thelluara nga SPAK për këto akuza publike që vajza e ish-kryeministrit ka bërë ndaj saj.
Gjatë një konference për shtyp të zhvilluar në datën 23 shtator 2024, Argita Malltezi deklaroi se të paktën 17 prokurorë dhe gjykatës të strukturës së posaçme janë në dosjen e “Encrochat”. E madje, sipas Argitës “gjyqtarja Gjoka del në një video, duke i kërkuar një ish-eksponenti të PS 500 mijë euro që rë mos e fuste në grup të strukturuar kriminal”.
Pavarësisht kësaj, Malltezi theksoi se i është referuar shkrimeve që ekzistonin në media, “që e akuzonin zonjën në fjalë për ato të cilat ajo nuk i kundërshton dot dhe nuk i ka kundërshtuar”.
“Ajo megjithatë ka kërkuar që Dumani t’i lajë fytyrën. Vë në dyshim standartin e dyfishtë të kësaj godine këtu. Unë dhe Jamarbri kemi bërë disa kallëzime për çështje konkrete për falsifikim aktesh konkrete”, përmbylli Malltezi.
