Protesta e shoqtaës ‘Çamëria’ dhe deputetëve të PDIU para ministrisë së Jashtme është tensionuar. Deputetja Mesila Doda është konfliktuar me një punonjës të policisës ç’ka ka sjellë irritimin e turmës.
Ka qenë Ditmir Bushati ai që i është afruar turmës duke i bërë thirrje për qetësi, ndërsa nënkryetari i Kuvendit, Shpëtim Idrizi, ka komunikuar me ministrin Bushati. Mësohet se në prag të takimit me homologun grek, Bushati u takua për pak minuta me Idrizin ndërsa nuk dihet çfarë është biseduar.
Ndërkohë, eskorta e ministrit Nikos Kotzias ka mbërritur në Ministrinë e Punëve të Jashtme, ndersa ka nisur kështu edhe takimi mes dy homologëve.
***
Ministri i Jashtëm grek Nikos Kotzias ka nisur sot në Tiranë një vizitë dyditore. Por ai është pritur me protesta nga shoqata “Çamëria”, para Ministrisë së Jashtme.
Kryetari i Shoqatës, Abaz Hado, tha se “ne e mirëpresim Kotzias, por e vërteta duhet të dalë”.
Para kësaj godine vihet re një prani e shtuar e forcave të policisë për të siguruar mbarëvajtjen e protestës. Te pranishem jane edhe deputetet e PDIU, Shpetim Idrizi, Mesila Doda dhe Tahir Muhedini.
Protestuesit kanë bllokuar dy trotuaret e rrugës dhe trotuaret në krah të MPJ dhe në krah të lumit Lana.
“Çamëri nëna jonë na prit”, “Hiqni ligjin e luftës”, janë disa nga pankartat që mbajnë në duar protestuesit.
Një ditë më parë, ka patur edhe një reagim të shoqatës “Çamëria”.
“Ministria e Jashtme Greke vijoi me qëndrimin absurd se çështja çame nuk ekziston. Nesër, në orën 8:30 të mblidhemi përpara Ministrisë së Jashtme të Shqipërisë me moton “Unë jam shqiptar i Çamërisë, unë ekzistoj”, gjatë takimit mes ministrave të Jashtëm te dy vendeve!”, deklaron shoqata.
Ditën e sotme, ministri grek Kotzias do takojë në Tiranë ministrin e Jashtëm të Shqipërisë, Ditmir Bushati, pas së cilës të dy ministrat do të bëjnë deklarata të përbashkëta për shtyp.
Më pas zyrtari i lartë grek do pritet nga Presidenti i vendit Bujar Nishani, si dhe do të takohet më pas me Kryepeshkopin e Tiranës, Durrësit dhe gjithë Shqipërisë, Anastas Janullatos.
Të martën, më 7 qershor, Kotzias do të jetë folësi kryesor në një eveniment të organizuar nga Universiteti i Tiranës për rëndësinë e marrëdhënieve shqiptaro-greke për të ardhmen evropiane të rajonit.
Ministri i Jashtëm do të takohet këtë ditë edhe me liderin e opozitës, Lulzim Basha, si dhe me përfaqësues të minoritetit grek në Shqipëri. Ditë më parë mediat paralajmëruan se çështje të nxehta si marrëveshja për detin, ligji i luftës, apo çështja e pazgjedhur e pronave do të jenë në fokusin e kësaj vizite.
“Kathimerini” shkroi se Kotzias do të mbërrijë në Tiranë me një paketë propozimesh për zgjidhjen e çështjeve të mbetura pezull mes dy vendeve si ndarja e Zonës Ekonomike Ekskluzive mes dy vendeve, problemet e pronësisë, si dhe nxjerrja e eshtrave të rreth 11.000 ushtarëve grekë të cilët u vranë gjatë luftës italo-greke në vitet 1940-1941 në territorin shqiptar. Sipas gazetës, pjesë e propozimeve do të jetë edhe kërkesa për mbrojtjen e të drejtave të minoritetit grek në Shqipëri.
D.i.
