Lufta në Ukrainë po hyn në një fazë të re përshkallëzimi, me përplasje të ashpra përgjatë vijës së frontit dhe sulme ajrore që kanë prekur edhe territoret e brendshme të Rusisë.
Forcat ruse kanë intensifikuar bombardimet ndaj zonave të banuara në lindje të Ukrainës, duke shkaktuar viktima dhe të plagosur mes civilëve. Sipas autoriteteve ukrainase, sulmet në rajonet Donetsk dhe Dnipropetrovsk kanë lënë pas shtatë të vrarë dhe më shumë se 20 persona të plagosur.
Donetsku vijon të mbetet një nga zonat më të nxehta të luftimeve. Në këtë rajon janë raportuar viktima në zonat pranë Kostantinivkës, ndërsa një tjetër person ka humbur jetën pranë Kramatorskut, qytet i konsideruar një pikë strategjike për mbrojtjen ukrainase.
Ndërkohë, edhe rajoni i Dnipropetrovskut është përballur me një valë sulmesh me artileri dhe dronë. Autoritetet lokale kanë raportuar viktima dhe të plagosur në disa komunitete, përfshirë qytetin Nikopol, i cili prej kohësh ndodhet nën presionin e sulmeve.
Përballë ofensivës ruse, Ukraina ka ndërmarrë një kundërpërgjigje të fuqishme ajrore, duke goditur objektiva thellë brenda territorit rus. Një nga sulmet më të mëdha u regjistrua gjatë natës, kur qindra dronë ukrainas synuan rajonin e Moskës.
Autoritetet ruse deklaruan se mbi 390 dronë u përfshinë në sulm, shumica e të cilëve u neutralizuan nga sistemet e mbrojtjes ajrore. Kryebashkiaku i Moskës, Sergei Sobyanin, tha se 81 dronë u shkatërruan gjatë afrimit ndaj kryeqytetit, ndërsa autoritetet rajonale raportuan dëme në disa banesa dhe prona.
Sulme të tjera u regjistruan edhe në rajonin kufitar të Belgorodit, ku një dron ukrainas goditi një objekt tregtar, duke shkaktuar një viktimë dhe dy të plagosur.
Ky përshkallëzim ushtarak ndodh në një moment të rëndësishëm diplomatik, teksa presidenti ukrainas Volodymyr Zelensky ka mbërritur në Uashington për një takim me presidentin amerikan Donald Trump.
Bisedimet në Shtëpinë e Bardhë pritet të fokusohen te vazhdimi i mbështetjes amerikane për Ukrainën, ndihma ushtarake dhe ekonomike, si dhe përpjekjet për gjetjen e një rruge drejt përfundimit të konfliktit.
