Ministri i Jashtëm Ditmir Bushati ka folur nga Shkodra në lidhje me tensionet e ditëve të fundit mes PS-së dhe LSI-së, nga ku ka theksuar se koalicioni do të vijojë deri më 18 qershor. Bushati është shprehur gjithashtu se PS është e gatshme dhe e hapur për çdo forcë politike për vijimin e koalicionit.
Ndërsa në lidhje me akuzat e Vangjel Tavos, kreu i diplomacisë shqiptare ka zgjedhur që të përgjigjet duke thënë se do më shumë SHBA-në dhe BE-në kur vjen puna për vlerësimin e situatës së kanabisit.
“Nuk ka diskutim që kjo është një kontratë jo thjesht disa partive politike por mbi të gjitha një kontratë që shqiptarët e kanë votuar me 23 qershor. Jemi të gatshëm dhe të hapur për çdo forcë politike për të vijuar koalicionin, për ta shtuar koalicionin në kontribute dhe vlera. Një mandat i qartë për PS edhe në zgjedhjet që presim me 18 qershor është një garanci që reformat do zbatohen….
Jemi të përqendruar totalisht tek puna sepse me 18 qershor ne si qeveri, PS do tu japë llogari qytetarëve shqiptarë sa i përket përmbushjes së reformave dhe sa i përket përmbushjes së zotimeve të marra. E dua Vangjelin, por më shumë dua SHBA dhe BE. Dhe kur vjen puna për vlerësimin e reformave dhe sfidave që duhet të përballojmë të gjithë sëbashku, përfshirë dhe Vangjelin, besoj se ekspertiza amerikane dhe ekspertiza e shërbimeve të Komisionit Euriopian të vendeve anëtare është një pikë shumë e mirë reformimi të mëtejshme për gjithë institucionet shqiptare.”- tha Bushati.
Po sot deputeti i LSI Vangjel Tavo, i intervistuar nga një media greke, është shprehur se “policia po bashkëpunon me trafikantët”.
“Policia të mos mbështesë kriminelët, por të merret me problemet e njerëzve, me grabitjet, bastisjet, me vjedhjet. Mbjellja e kanabisit këtu është kthyer në një fenomen dhe në shumë raste policia ka lidhje me personat që kultivojnë kanabis”– ka thënë Tavo për “TV Star”.
/java/a.k
