Protesta e 94-të radhazi kundër qeverisë po zhvillohet këtë të martë në Tiranë (1 shtator), ndërsa situata është tensionuar në zonën përpara Kryeministrisë.
Protestuesit kanë tentuar të çajnë kordonin e policisë dhe të hyjnë në ambientet e godinës së Kryeministrisë, por janë ndalur nga forcat e rendit.
Ata kanë sfiduar kryeministrin Edi Rama, pasi kanë mësuar se ai ndodhej në zyrë, duke thirrur “Dil në bulevard”.
Në këto momente, policia është vendosur “gardh” para godinës, duke penguar protestuesit të afrohen më tej. Situata vijon të jetë e tensionuar, ndërsa protestuesit kërkojnë të futen në ambientet e Kryeministrisë.
Protesta e sotme shënon ditën e 94-të të një aksioni qytetar që ka nisur prej më shumë se tre muajsh.
Tensionet kanë nisur pasi protestuesit kaluan pas godinës së Kryeministrisë, për të bllokuar hyrjen kryesore, ku futet e del eskorta e kryeministrit Edi Rama dhe zyrtarëve të tjerë.
Gjatë tensioneve ishin të pranishëm edhe disa prej të vetëshpallurve si organizatorë të protestës, mes të cilëve edhe Dritan Goxhaj dhe Arben Kola, të cilët përmes megafonit kanë nxitur të pranishmit që të rrethojnë godinën e Kryeministrisë.
Ende nuk dihet zyrtarisht nëse kryeministri Edi Rama ka qenë brenda godinës së Kryeministrisë, në momentin e tensioneve mes protestuesve dhe efektivëve të Policisë.
Kërkesa kryesore e protestuesve mbetet dorëheqja e kryeministrit Edi Rama, ndërsa në listën e kërkesave të tyre përfshihen edhe ndryshimi i klasës politike dhe krijimi i një qeverie tranzitore me mandat 12-mujor.
Organizatorët kanë paralajmëruar gjithashtu përshkallëzim të protestave gjatë muajve shtator dhe tetor, duke kërkuar një mobilizim më të gjerë qytetar.
