Presidenti i Argjentinës, Javier Milei, ka paralajmëruar Britaninë se do të nisë një proces ligjor ndërkombëtar nëse nuk ndalet projekti i kërkimit dhe nxjerrjes së naftës pranë ishujve Falkland, të cilët Argjentina i quan Malvinas.
Në një postim në rrjetet sociale, Milei i ka dhënë qeverisë britanike dy javë kohë për të ndaluar projektin Sea Lion, që zhvillohet nga kompanitë britanike dhe izraelite Rockhopper Exploration dhe Navitas Petroleum.
Presidenti argjentinas tha se, nëse projekti nuk ndalet brenda këtij afati, ai ka udhëzuar Ministrinë e Jashtme dhe ekipet ligjore të vendit të nisin një procedurë ndërkombëtare arbitrazhi kundër Britanisë.
Milei e ka cilësuar projektin si shfrytëzim të paligjshëm të burimeve natyrore të territorit. Ai ka paralajmëruar gjithashtu se Argjentina mund ta çojë çështjen në Tribunalin Ndërkombëtar për të Drejtën e Detit. Nga ana tjetër, kompanitë që zhvillojnë projektin thonë se kanë licenca të vlefshme të lëshuara nga autoritetet e ishujve Falkland.
Projekti Sea Lion ndodhet rreth 209 kilometra nga ishujt dhe besohet se zona mund të përmbajë rreth 1.7 miliardë fuçi naftë. Kompanitë planifikojnë të fillojnë nxjerrjen e naftës brenda dy viteve. Përplasja e re vjen në një kohë kur marrëdhëniet mes Argjentinës dhe Britanisë mbeten të tensionuara për shkak të mosmarrëveshjes mbi sovranitetin e Falklandit.
Në vitin 1982, Argjentina pushtoi ishujt, duke shkaktuar një luftë 74-ditore me Britaninë. Forcat britanike rimorën kontrollin e territorit. Në konflikt humbën jetën 255 ushtarë britanikë, 649 ushtarë argjentinas dhe tre banorë të ishujve.
Në një referendum të zhvilluar në vitin 2013, 99.8% e banorëve të Falklandit votuan për të vazhduar statusin e ishujve si territor britanik përtej detit. Mosmarrëveshja për sovranitetin mbetet ende e pazgjidhur, ndërsa projekti i naftës po shton tensionet mes dy vendeve.
