Ministri i Jashtëm i Rusisë Sergey Lavrov bëri me dije se Moska do të mbyllë qendrat kulturore gjermane në të gjithë vendin, përfshirë disa degë të Institutit “Goethe” në përgjigje të urdhrit të Gjermanisë për mbylljen e qendre kulturore “Shtëpia Ruse” në Berlin.
Instituti “Goethe”, i financuar nga Ministria e Jashtme e Gjermanisë, është një organizatë jofitimprurëse që promovon studimin e gjuhës gjermane.
Njoftimi vjen pasi Gjermania vendosi sanksione ndaj Moskës këtë javë, përfshirë mbylljen e konsullatës së përgjithshme të Rusisë në Bon, duke akuzuar Moskën për një tentativë sulmi hibrid në aeroportin e Lajpcigut muajin e kaluar, ku u gjet një dron i ngarkuar me eksploziv.
Rusia i cilësoi akuzat e Berlinit si të pabaza dhe absurde. “Gjermanët kanë degë të Institutit “Goethe” në vendin tonë. Sigurisht, ato do të mbyllen sapo qendra jonë kulturore të jetë detyruar të largohet nga Berlini”- tha ministri i Jashtëm rus Sergei Lavrov, duke shtuar se do të preken degët e grupit në Moskë, Shën Petersburg dhe Jekaterinburg.
Në një reagim, Gjermania shprehu keqardhje për vendimin e Rusisë. “Instituti “Goethe” ka luajtur një rol të rëndësishëm në Rusi si një urë kulturore dhe ne ishim të përgatitur ta vazhdonim atë bashkëpunim”- deklaroi ministri i Jashtëm gjerman Johann Wadephul.
Tensionet midis dy vendeve u rritën që kur Berlini akuzoi Moskën se qëndron pas një incidenti me dron në aeroportin e Lajpczigut muajin e kaluar, ndërsa dy vendet thirrën për sqarime të dërguarit përkatës në shtetet e tyre.
