Tregjet financiare ndërkombëtare u përballën me luhatje të forta këtë të hënë, ndërsa tensionet e reja në Lindjen e Mesme shtuan frikën për rritje të inflacionit dhe mundësinë që bankat qendrore të detyrohen të rrisin më tej normat e interesit.
Çmimi i naftës Brent, standardi ndërkombëtar i naftës, u rrit ndjeshëm pas raportimeve për një sulm ndaj një centrali bërthamor në Emiratet e Bashkuara Arabe. Investitorët reaguan menjëherë ndaj rrezikut të përshkallëzimit të konfliktit në rajonin e Gjirit, një nga zonat më të rëndësishme për furnizimin global me energji.
Nafta Brent arriti deri në 111.16 dollarë për fuçi, niveli më i lartë në gati dy javë, përpara se të zbriste sërish pranë 110 dollarëve pasi Irani njoftoi se kishte kthyer përgjigje ndaj një propozimi të ri amerikan për t’i dhënë fund luftës dhe krizës rajonale.
Zëdhënësi i Ministrisë së Jashtme iraniane, Esmaeil Baqaei, deklaroi se komunikimet mes palëve “po vazhdojnë përmes ndërmjetësimit pakistanez”, pa dhënë detaje të tjera.
Situata u tensionua më tej pas deklaratës së presidentit amerikan Donald Trump, i cili paralajmëroi Iranin në platformën Truth Social se “ora po ecën” dhe se Teherani duhet të arrijë shpejt një marrëveshje ose “nuk do të mbetet asgjë prej tyre”.
Përveç tregut të energjisë, tensionet ndikuan edhe në tregjet e obligacioneve globale. Yield-i i bonove 10-vjeçare të Thesarit amerikan u ngjit në 4.631%, niveli më i lartë që nga shkurti 2025, përpara se të stabilizohej disi më vonë gjatë ditës.
Edhe në Mbretërinë e Bashkuar tregjet financiare pësuan luhatje të forta. Yield-i i obligacioneve britanike 10-vjeçare arriti në 5.19%, duke kaluar rekordin më të lartë të 18 viteve të fundit, i vendosur vetëm pak ditë më parë.
Analistët thonë se paqëndrueshmëria në Britani nuk lidhet vetëm me krizën ndërkombëtare, por edhe me tensionet politike të brendshme. Investitorët po ndjekin me shqetësim spekulimet se kryeministri Keir Starmer mund të përballet me një sfidë për udhëheqjen nga kryebashkiaku i Mançesterit, Andy Burnham.
Në Paris, ministrat e financave të vendeve të G7, zhvilluan takime për të diskutuar ndikimin ekonomik të konfliktit në Lindjen e Mesme dhe rrezikun që çmimet e energjisë të ushqejnë një valë të re inflacioni global.
Ekspertët paralajmërojnë se nëse tensionet mes SHBA-ve, Iranit dhe Izraelit vazhdojnë të përshkallëzohen, tregjet globale mund të përballen me një periudhë të re pasigurie ekonomike, rritje të kostove të energjisë dhe presion më të madh mbi ekonomitë botërore.
Ndërkohë në Japoni, yield-et e obligacioneve u rritën ndjeshëm, me obligacionin 10-vjeçar që arriti nivelin 2.8%, më i larti në afro 30 vjet. Rritja vjen ndërsa qeveria japoneze përgatitet të emetojë borxh të ri për të mbështetur ekonominë përballë ndikimit të konfliktit në Lindjen e Mesme dhe rritjes së kostove energjetike.
Edhe bursat europiane nisën javën në territor negativ. Indeksi STOXX Europe 600, që ndjek kompanitë më të mëdha të listuara në Europë, ra me 0.7%.
Në Londër, indeksi kryesor FTSE 100 mbeti pothuajse i pandryshuar, ndërsa investitorët prisnin sinjale të reja nga tregjet e obligacioneve dhe zhvillimet gjeopolitike.
Edhe tregjet aziatike regjistruan humbje. Indeksi japonez Nikkei 225 humbi rreth 1%, ndërsa indeksi Hang Seng Index në Hong Kong ra po ashtu me 1%.
Në Kinë, indeksi SSE Composite Index i Shangait zbriti me 0.1%, ndërsa në Korenë e Jugut, indeksi KOSPI arriti të mbyllej me një rritje të lehtë prej 0.3%.
Analistët paralajmërojnë se paqëndrueshmëria në tregje mund të vazhdojë nëse konflikti në Lindjen e Mesme përshkallëzohet më tej, duke rritur frikën për inflacion më të lartë, norma interesi më të shtrenjta dhe ngadalësim ekonomik global.
