Të paktën 19 persona kanë humbur jetën si pasojë e sulmeve ajrore izraelite në jug të Libanit, njoftoi Ministria libaneze e Shëndetësisë. Mes viktimave raportohet se ka gra dhe fëmijë, ndërsa dhjetë persona u vranë në një sulm të vetëm që goditi një banesë në qytetin Deir Qanoun.
Sipas autoriteteve libaneze, në sulm mbetën të plagosur edhe disa persona të tjerë, mes të cilëve edhe një vajzë të mitur. Ndërkohë, në rajonet Nabatieh dhe Tyre, sulme të tjera ajrore shkaktuan nëntë viktima dhe dhjetëra të plagosur.
BBC shkruan se përplasjet mes Izraelit dhe grupit militant Hezbollah vazhdojnë pavarësisht marrëveshjes për zgjatjen e armëpushimit me 45 ditë, të ndërmjetësuar nga Shtetet e Bashkuara. Dy palët pritet të rikthehen në tryezën e bisedimeve në fillim të muajit qershor, por situata në terren mbetet e tensionuar.
Izraeli deklaron se objektiv i operacioneve ushtarake është Hezbollah, organizatë e mbështetur nga Irani, ndërsa Libani akuzon ushtrinë izraelite për goditje që kanë prekur rëndë civilët.
Nga ana tjetër, Hezbollah njoftoi se luftëtarët e tij janë përballur me forcat izraelite në zonën e Haddatha-s dhe pretendoi se ka shkatërruar një tank izraelit. Grupi gjithashtu tha se ka sulmuar pozicione ushtarake izraelite dhe sisteme të mbrojtjes ajrore “Iron Dome” pranë kufirit verior të Izraelit.
Ushtria izraelite konfirmoi gjithashtu vdekjen e një ushtari gjatë përleshjeve në jug të Libanit.
Sipas Ministrisë së Shëndetësisë së Libanit, numri total i viktimave nga sulmet izraelite që prej nisjes së konfliktit në mars ka kaluar mbi 3 mijë persona.
Situata në kufirin Izrael-Liban vijon të mbetet e paqëndrueshme, ndërsa frika për një përshkallëzim më të gjerë të konfliktit në rajon vazhdon të rritet.
