Gjatë një vizite të paparalajmëruar në Bagdad të Irakut, sekretari amerikan i mbrojtjes, Ashton Carter, ka njoftuar se Shtetet e Bashkuara do të dërgojnë 560 trupa shtesë në Irak, duke bërë që numri i trupave amerikane në Irak të arrijë në 4,647.
560 trupat shtesë, që pritet të dërgohen në Irak, do të ofrojnë ndihmë logjistike dhe infrastrukturore në bazën ajrore në Qarayyah, rreth 40 kilometra në jug të Mosulit.
Mosul aktualisht është nën kontrollin e ISIS-it. Iraku ka paralajmëruar se do të nis një ofensivë të madhe për të rimarrë kontrollin e këtij qyteti.
Më herët gjatë ditës, Carter tha se SHBA’të dhe forcat e koalicionit do të përdorin këtë bazë ajrore dhe nga aty të nisin sulmet për të rimarrë Mosulin./a.m.
