Ekonomia shqiptare pritet të ngadalësohet gjatë këtyre dy viteve (2026-2027), për shkak të pasigurive globale dhe rritjes së çmimeve të energjisë, të cilat po shtojnë presionet mbi aktivitetin ekonomik. Ky është vlerësimi i fundit i Komisionit Evropian në ‘Raportin Ekonomik të Pranverës’.
“Si një ekonomi e vogël dhe e hapur, Shqipëria përballet me rreziqe të jashtme që burojnë nga pasiguria globale dhe tensionet gjeopolitike, të cilat pritet të ndikojnë te rritja përmes partnerëve kryesorë tregtarë në BE. Progresi në negociatat për anëtarësimin në BE përfaqëson një mundësi pozitive për rritjen ekonomike, përmes përmirësimit të klimës ekonomike”, thuhet në raport.
Ekonomia thuhet në raport gjatë 2026-ës dhe 2027-ës nuk do të ketë rritje më shumë se 3.3%, si dhe pritet një ngadalësim i sektorit të turizmit, ndërsa investimet thuhet se do të jenë në rritje ndikuar edhe prej ‘Planit të Rritjes me BE’.
“Turizmi pritet të mbetet një motor kryesor i rritjes, edhe pse zgjerimi i tij ka gjasa të ngadalësohet me maturimin e sektorit. Investimet parashikohet të mbeten të forta, të mbështetura nga kushte të favorshme financimi, rritja e vazhdueshme e kreditimit dhe flukset nga fondi i reformës dhe rritjes i Bashkimit Evropian”, thuhet në raport.
Megjithatë KE parashikon se Shqipëria do të ketë rritjen më të lartë në rajon, ndjekur nga Maqedonia e Veriut 3.2% e Malin e Zi 2.8% për të vijuar me Serbinë 2.8% dhe Bosnje-Hercegovinën 1.8%.
Komisioni Evropian vlerëson se konflikti në Lindjen e Mesme do të ndikojë në rritjen e inflacionit mbi 3% brenda këtij viti, dhe në vitet e ardhshme të zbresë pranë objektivit të Bankës së Shqipërisë që është 3%.
