Tensionet rreth ngushticës së Hormuzit mbeten të larta, ndërsa Irani jep sinjale kontradiktore për hapjen e kësaj rruge strategjike detare. Marina e Gardës Revolucionare Islamike ka deklaruar se asnjë anije nuk do të lejohet të kalojë në ngushticën e Hormuzit pa koordinim me autoritetet iraniane.
Presidenti iranian, Masud Pezeshkian, tha se Irani dhe Omani kanë arritur një mirëkuptim për rikthimin e lundrimit përmes ngushticës, por vetëm në bazë të një kuadri të koordinuar dhe me kushte të caktuara.
“Arritëm një mirëkuptim dhe pranuam që rruga të hapet mbi bazën e një marrëveshjeje të koordinuar. Tani po e ndjekim këtë çështje brenda kornizave të dakordësuara. Nëse Shtetet e Bashkuara përmbushin angazhimet e tyre, heqin bllokadën detare, sanksionet ndaj naftës dhe produkteve petrokimike, si dhe zhbllokojnë fondet e Iranit, atëherë ne do ta hapim rrugën përmes ngushticës së Hormuzit.”
Pezeshkian theksoi gjithashtu se Teherani po kërkon një qasje të përbashkët me vendet e rajonit, përfshirë Arabinë Saudite, Turqinë, Emiratet e Bashkuara Arabe, Katarin, Pakistanin dhe Omanin.
“Pse duhet të përplasemi me vendet islame? Pse të mos gjejmë një gjuhë të përbashkët dhe të garantojmë së bashku sigurinë e rajonit? Është e mundur përmes dialogut, diskutimit dhe angazhimit.”
Ndërkohë, presidenti iranian tha se sanksionet amerikane kanë goditur ndjeshëm ekonominë e vendit. Sipas tij, eksportet dhe importet kanë rënë me 25 deri në 35 për qind. Ndërsa, gjatë gjithë kësaj periudhe të shkurtër të lehtësimit të kufizimeve, Irani kishte eksportuar rreth 90 milionë fuçi naftë.
Ngushtica e Hormuzit mbetet një nga pikat më kritike të konfliktit, pasi përmes saj kalon një pjesë e konsiderueshme e furnizimit global me naftë.
