Duket se vizita e ministrit të Jashtëm grek në Prishtinë dhe deklaratat që ka bërë në konferencën për shtyp me shefin e diplomacisë kosovare, Hashim Thaçin, po vazhdojnë të krijojnë tensione të vazhdueshme mes Beogradit dhe Athinës. Analisti Dusan Janjiç deklaron se Greqia do ta njohë Kosovën për t’i kthyer borxhin Amerikës.
Shtypi serb ende shkruan për deklaratat e kryediplomatit grek Nikolas Kotzias, i cili nuk hezitoi të tregonte miqësi ndaj Kosovës duke premtuar edhe votën greke për anëtarësinë e Kosovës si shtet në UNESCO dhe Interpol.
Vendimin e Greqisë, Kotzias e shpalosi në një konferencë për shtyp që e mbajti gjatë vizitës në Prishtinë së bashku me homologun kosovar, ministrin e jashtëm Hashim Thaçi.
Deklaratat e ministrit Kotzias u publikuan edhe në faqen zyrtare të Ministrisë së Jashtme të Greqisë, ndërsa ministri i jashtëm serb Ivica Dacic ishte i pari që reagoi duke i dërguar notë proteste Greqisë. Deri më tani nuk dihet nëse Greqia i është përgjigjur Beogradit zyrtar.
E përditshmja “Blic”, gazeta më e madhe serbe që rëndom transmeton linjën e qeverisë, prej disa ditësh ka nisur një fushatë të vërtetë kundër kryeministrit grek Tsipras.
Fillimisht “Blic” javën e kaluar botoi një artikull në me titull “Tsipras, tradhtove për Kosovën!”, duke akuzuar kryeministrin grek që qëndron prapa deklaratave të diplomacisë greke.
Edhe pse ambasada greke në Beograd ka deklaruar se “qëndrimi i Greqisë mbetet i pandryshueshëm dhe nuk e njeh Kosovën”, “Blic” ka vazhduar këtë fundjavë edhe me një shkrim tjetër të titulluar “Dashuria e re në mes të Greqisë dhe Kosovës – Tsipras kthen borxhin Amerikës në dëm të Serbisë”.
“Blic” raporton se “përkrahja që i ka dhënë Uashingtoni kryeministrit Aleksis Tsipras në konfliktin që ka pasur me kancelaren Merkel ka ardhur me faturë të menjëhershme, në formë të kërkesës për njohje të Kosovës”.
