Me ndryshimin e sezonit dhe të klimës ka ndryshuar dhe sëmundshmëria në Gjirokastër. Këtë periudhë në urgjencën e spitalit rajonal “Omer Nishani” kryesojnë rastet me eneteroviroza dhe gastroenterite thotë mjeku Bledar Çela, të cilëve u është dhënë mjekimi i nevojshëm për përmirësimin e gjendjes shëndetësore.
“Ditët e fundit kemi pasur shumë persona në urgjencë, pra një fluks të shtuar me enteroviroza, gastroenterite, të vjella, diarre dhe helmime ushqimore. Këta pacientë janë paraqitur në urgjencë, ku u është dhënë mjekimi i nevojshëm sipas rastit. Për rastet më të lehta, pacientët kanë marrë një recetë dhe janë kthyer në shtëpi. Në momentet kur komprometohen treguesit, si tensioni, temperatura e lartë ose kur ka dehidrim, një pjesë e tyre kanë marrë edhe mjekim në urgjencë. Megjithatë, mund të them se jo çdo herë është i nevojshëm trajtimi në urgjencë me serume apo me mjekime të tjera venoze, pasi edhe ato në vetvete paraqesin një risk”, tha mjeku.
Mes pacientëve që janë paraqitur nuk kanë munguar edhe turistët fluksi i të cilëve është shtuar ndjeshëm në qytet.
Ndërsa këshillat që vijnë nga bluzat e bardha për të shmangur këto gjendje janë konsumimi i ujit, kujdes me ushqyerjen, shmangien e daljeve në temperature të larta.
