Mes temperaturave të nxehta, ministri i Mbrojtjes Niko Peleshi ka pasur një apel për qytetarët. “Mbroni pyjet” është thirrja e Peleshit, duke vënë theksin te bashkëpunimi i autoriteteve me qytetarët, pasi në të shumtën e rasteve ka rezultuar se pakujdesia ka qenë shkaktari kryesor i zjarreve.
“Situata emergjente e zjarreve është një sfidë e madhe për të gjithë ne dhe mënyra më e mirë për t’u përballur me të është të jemi të përgatitur për të shmangur rreziqet për të mbrojtur veten, të tjerët dhe natyrën e vendit tonë. Bashkëpunimi dhe kujdesi i çdo individi janë thelbësore për të reduktuar rreziqet dhe për të siguruar jetën tonë dhe të komunitetit.
Kujdesi ndaj zjarreve duhet të jetë prioritet për të gjithë ne. Bashkë, për sigurinë dhe mirëqenien e të gjithëve. Telefononi menjëherë 128 Shërbimin e Zjarrfikëses, në çdo kohë e për çdo rast emergjence”, shkruan Peleshi.
Vitin e kaluar, Shqipëria “u pushtua” nga flakët nga veriu në jug, e ndërsa një pjesë e konsiderueshme ka qenë e qëllimshme. Rikujtojmë se zjarret e qëllimshme ose nga pakujdesia dënohen sipas ligjit.
/a.r
