Pas vendimit të Këshillit Bashkiak për shkarkimin e Erion Veliajt nga posti i kryetarit të Bashkisë së Tiranës, nënkryetari i këtij këshilli, Dorian Teliti, në emisionin “Off the Record” të Andrea Dangllit në A2 CNN, ka ngritur dyshime mbi mënyrën se si u zhvillua procedura.
Në një deklaratë publike, Teliti theksoi se do të kishte dashur ta kishte Veliajn përballë gjatë seancës për dy arsye kryesore. “Ti po e shkarkon tjetrin nga detyra dhe ai duhet dëgjuar. Mua nuk më ka marrë malli të dëgjojë Erion Veliajn, por nuk dua t’i jap instrumentet atij që nesër të shkojë në gjykatë dhe ta hedhë poshtë vendimin për aspekte proceduriale. Për këtë arsye do të doja të ishte aty. Arsyeja e dytë është se të paktën një herë doja t’ia thosha në sy dëmet që i ka bërë Tiranës,” tha ai.
Teliti shtoi se opozita kishte kohë që kërkonte largimin e Veliajt, por mazhoranca sipas tij e nisi procesin në mënyrë të njëanshme. “Ne e kemi kërkuar disa herë shkarkimin e Veliajt, por mazhoranca nuk pranoi ta bënte në bashkëpunim me opozitën,” theksoi ai.
Teliti ka nënvizuar se opozita do të vijojë të kërkojë zgjedhje të lira dhe të ndershme në kryeqytet, duke e cilësuar largimin e Veliajt si një hap të rëndësishëm, por jo përfundimtar.
