Zhurma për drejtorin e përgjithshëm të RTSH, televizionit publik shqiptar, vijon të mbajë ende gjallë interesin e mediave dhe të një pjese të opinionit publik që ende e ka në merak fatin e transmetuesit, dikur simbol i një Shqipërie tjetër.
Shumëkush u ngatërrua nga votimi i fundit i Këshillit Drejtues të TVSH para dy ditësh. Kjo ndodhi sepse njëri ndër kandidatët, rektori aktual i Universitetit të Arteve Petrit Malaj, mori gjashtë nga 11 votat e Këshillit. Duhet thënë se ky qe votimi i dytë që kryhej për të zgjedhur drejtorin e përgjithshëm, ku Malaj nuk mundi të bëhet dot drejtues i RTSH, Pasi për t’u zgjedhur duhen shtatë, e jo gjashtë vota të fshehta të Këshillit.
Pesë votat e mbetura i mori rivali i tij Thoma Gëllçi, gazetar i vjetër i mediave të shkruara. Këto dy kandidatura kanë mbetur në garë, pas një aradhe të gjatë emrash publikë (16 të tillë), u paraqitën për t’u futur në garën për drejtor të përgjithshëm të RTSH. Nga kjo listë, sot emri i drejtorit të ri do të dalë nga dyshja Malaj-Gëllçi, por këtu duket se nisin problemet. Të cilat nuk kanë të bëjnë më vetëm me profilin dhe personin e garuesve, por, siç ndodh gjithmonë kur zgjidhet kreu i medias më të madhe publike, kanë të bëjnë me llogari të shumta, pas perdeve të trasha të politikës shqiptare.
Ata që e kanë ndjekur nga afër garën për kreun e RTSH shprehen me siguri se kandidatura e Petrit Malajt, një ish-deputet i PS në vitin 2005 dhe anëtar i dorëhequr i Asamblesë së Partisë Socialiste, ndodhet paradoksalisht më pranë të djathtës, sesa partisë tij në këto momente. Aq sa në votimin e fundit, thuhet se pesë votat që shkuan në drejtim të rivalit të tij Gëllçi, i përkisnin anëtarëve të propozuar nga e majta, kurse gjashtë votat e Malajt përfaqësonin të djathtën dhe LSI.
I gjithë ky lëmsh përflitet se ka të bëjë me lobimin që kandidatët kanë bërë për të fituar shumicën e votave, duke kërkuar OK nga palët respektive në Këshillin Drejtues të RTSH. Ndodhemi kështu në situatën paradoksale kur dy emra që në gjenezë i përkasin të majtës (madje një të majte disi të vjetër në kohë), janë sot në garë me votat e dy krahëve të kundërt. Çka e bën votimin e ditës së enjte mjaft kompleks dhe të paparashikueshëm.
