Teksa mbërrinte më herët në një samit të BE-së në Versajë, presidenti francez Emmanuel Macron i tha BBC-së se ai mbetet optimist për bisedimet, por nuk e sheh armëpushimin si realist në orët e ardhshme.
I pyetur nga redaktori i BBC Europe, Katya Adler nëse ai pa shenja shprese pas bisedës së tij të mëparshme me presidentin rus, Macron tha se ai ishte “padyshim optimist – por unë përpiqem të jem gjithashtu realist”.
Ai hodhi poshtë kushtet që Presidenti Putin kishte vendosur në tryezë si “të papranueshme për askënd”.
Tani ishte një çështje nëse Putin ishte “gati të riangazhohej me ndershmëri dhe të propozonte diçka dhe ne do të punojmë sinqerisht, kolektivisht”.
Ai tha se do të fliste sërish me Putinin në orët e ardhshme dhe do të përpiqej të merrte “atë që duket të jetë realiste”.
“Nuk e shoh realiste armëpushimin në orët e ardhshme, të jem i sinqertë me ju”, tha ai.
Presidenti i Francës, Emmanuel Macron, ka thënë këtë të enjte se kushtet e vendosura nga homologu i tij rus, Vladimir Putin, për një armëpushim në Ukrainë “nuk janë të pranueshme”.
“Unë nuk shoh një zgjidhje diplomatike në orët e ardhshme apo edhe ditët në vijim”, ka thënë Macroni para gazetarëve në Versajë përpara samitit të liderëve të Bashkimit Evropian që do të përqendrohet në pushtimin rus të Ukrainës, zgjidhjet për rritjen e çmimeve të energjisë dhe më pak varësinë nga gazi dhe nafta ruse.
Këtë të enjte Macroni dhe kancelari gjerman, Olaf Scholz kanë zhvilluar një bisedë telefonike me presidentin rus, Vladimir Putin.
Presidenti francez tha se lufta në Ukrainë është një “tragjedi njerëzore, politike dhe humanitare”, por shtoi se “do të çojë në ripërcaktimin e plotë të arkitekturës së Evropës”. “Këto janë diskutime që janë strategjike dhe historike. Ato do të çojnë sot, javët dhe muajt e ardhshëm, në vendime historike për Evropën tonë”, ka thënë Macron./m.j
Çfarë do të thotë: Ripërcaktim i arkitekturës së re të Europës?!