Agjentët e FBI-së kanë arrestuar pothuajse të gjithë zyrtarët e një qyteti të vogël në Teksas, Cristal City. Qyteti ka gjithsej 7.500 banorë dhe pothuajse të gjithë zyrtarët lokalë janë arrestuar, të akuzuar për marrje ryshfeti.
Ndër të arrestuarit janë edhe kryebashkiaku, përfaqësuesi ligjor i qytetit, ashtu si edhe dy anëtarë dhe një ish-anëtar i Këshillit bashkiak.
Zyrtarët janë arrestuar nën akuzat se kanë marrë ryshfet dhe kanë ndihmuar kazinotë e paligjshme.
Richard Durbin, prokurori i Teksasit, ka theksuar se zyrtarët akuzohen se kanë keqpërdorur postin për t’u pasuruar përmes mitmarrjes.
Përfaqësuesi ligjor i qytetit ndërkaq akuzohet se është pjesë e rrjetit që siguronte kontrata në dëm të komunitetit në shkëmbim të 12 mijë dollarëve.
Njëri prej dy anëtarëve të Këshillit bashkiak që nuk janë arrestuar në këtë aksion, Joel Barahas, ka deklaruar se qyteti ka pësuar një dëm prej dy milionë dollarësh dhe rrezikon falimentimin.
Interesant është fakti që të arrestuarit mbeten në postet e tyre, pasi janë zgjedhur.
Media lokale shkruan se prokurori nuk ka kompetenca t’u heqë postet për të cilat janë votuar nga populli.
Deri në marrjen e vendimit për fajësinë e mundshme, e vetmja mënyrë e ndërrimit është që vetë qytetarët të bëjnë peticion.
Të akuzuarit mund të dënohen me dhjetë vjet burg dhe gjobë e pakta 250 mijë dollarë.
