Deputetja e Partisë Demokratike, Albana Vokshi deklaroi se selia blu ka zbuluar mashtrimin e madh që sipas saj po bëhet me truallin e Teatrit Kombëtar.
Sipas Vokshit, kompania “Fusha” ka vetëm 298 metër katrorë tokë, dhe jo aq sa pretendon qeveria, e për më tepër jo në kufi me teatrin.
“Edi Rama do të fitojë të paktën 205 milionë euro për kullat. Pavarësisht se Rama e ndaloi kryeregjistruesin e pronave të informonte Parlamentin, PD ka zbuluar mashtrimin e madh. E vërteta është se “Fusha shpk” nuk është pronar kufitar me pronën e teatrit, siç thotë qeveria. Ajo ka vetëm 298 metra katrorë në pronësi, jo në kufi me teatrin”, deklaroi Vokshi.
“5522 metra katrorë janë pronë e Teatrit Kombëtar, që do të grabitet për t’iu dhënë kompanisë “Fusha shpk”. 2100 metra katrorë janë pronë e Bashkisë Tiranë. 298 metra katrorë i ka “Fusha shpk” jo në kufi me teatrin. Edi Rama dhe kukullat e tij Veliaj dhe Kumbaro kanë gënjyer Kuvendin. Kjo është arsye që Presidenti të mos e dekretojë ligjin korruptiv”, shtoi Vokshi./a.m.
