Nga Enver Robelli
Kryetari i Kroacisë Zoran Millanoviq ju thotë dy anëtarëve të Presidencës së Bosnjës, boshnjakut Shefik Xhaferoviq dhe kroatit Zhelko Komshiq, se ju nuk do të arrini ta thyeni Republikën Serbe në Bosnjë.
Më 9 janar, kur Republika Serbe shënon ditën e themelimit, Kroacia dërgon diplomatë. Ndonëse shënimi i kësaj date nga Gjykata Kushtetuese e Bosnjës është shpallur antikushtetues.
Millanoviq, dikur socialdemokrat, po shndërrohet gjithnjë e më shumë një politikan agresiv, përçarës dhe përkrahës i nacionalistëve serbë në Bosnjë të prirë nga Millorad Dodiku.
Së fundi Millanoviq i ka pritur në kabinet disa kroatë të dënuar për krime të luftës në Hagë dhe ka deklaruar se nuk i pranon vendimet e gjykatës së OKB-së. Këtë e thotë presidenti i një vendi anëtar të Bashkimit Europian.
Millanoviq ia ka kthyer dekoratat Branimir Gllavashit, i cili akuzohet për krime të luftës në Osijek dhe rrethinë.
Deklarata e Millanoviqit se shteti qytetar në Bosnjë është ëndërr e largët dhe e bukur, por “së pari duhet sapuni, pastaj parfumi”, është konsideruar si fyerje e rëndë e popullit boshnjak, duke aluduar se është i papastër dhe i duhet sapuni.
E pabesueshme se në çfarë niveli ka rënë politika në pallatin presidencial në Zagreb, ky ku para disa vitesh presidentë ishin Stipe Mesiqi dhe Ivo Josipoviqi.
