Drejtoresha e Institutit të Shëndetit Publik (ISHP), Albana Fico, tha se në vendin tonë nuk ka mutacione të reja të virusit COVID-19, duke iu referuar variantit britanik apo atij afrikanojugor.
Gjatë një interviste televizive Fico deklaroi se rritja e infektimeve është një ngjarje e paralajmëruar, rezultat i një balance të thyer mes “lejes së dhënë” dhe përdorimit të përgjegjshëm të saj.
“Kjo është kronikë e një ngjarje të paralajmëruar. Kjo pasi herët në kohë, pas mbledhjes së Komitetit Teknik përpara fundit të vitit, kur u treguam të kujdesshëm në kërkesat tona për respektimin e masave, thamë se nëse do ketë shkelje të masave, do të kemi një rritje të numrave. Kemi patur rritje të numrit të pozitivitetit, përhapje të shtuar. Përhapja dyjavore e rritur. Këtë situatë e kanë ndërlikuar dhe informacionet me mutacione të virusit, që na ka bërë të jemi më të kujdesshëm ne si autoritete. Mutacionet, të gjitha genet mutante qoftë ai i Afrikës së Jugut, Anglisë, apo të tjerë, nuk janë në Shqipëri. Mutacionet kanë një vlerë për sjelljen tonë si autoritete apo qytetarë, pasi kanë transmetueshmëri më të lartë, por nuk janë vlerësuar si ato që shkaktojnë vdekshmëri të lartë. Por nga krahu tjetër, duhet të dimë dhe faktet e kanë treguar se, sa më shumë raste të kemi, aq më shumë të shtruar do kemi, aq më shumë të sëmurë rëndë dhe aq më shumë humbje jete”, – tha Fico.
Nëse do ketë sërish mbyllje për shkak të rritjes së numrit të të infektuarve me COVID-19 Fico tha se, “është kollaj të marrësh masa drastike për të mbyllur çdo gjë. Gjendja psiko-emocionale është marrë në konsideratë, për ne si mjekë, më shumë se ajo ekonomike për të mos bërë mbyllje drastike. Edhe lejimi i aktiviteteve ekonomike ishte dhe mbetet diçka që duhet të vijojë”.
“Unë besoj se është situatë delikate, sidomos kur shikohen numrat e rritur nëpër spitale. Por, kemi lënë në fuqi disa masa dhe po ndjekim me vëmendje situatën. Duhet të bëjmë një sforco, duke nisur nga vetja, më pas autoritetet shëndetësore dhe bizneset që të mos mbyllemi sërish”, shtoi Fico.
“Komiteti i Ekspertëve po monitoron situatën. Ne mblidhemi çdo ditë për të parë nëse do ketë ndërhyrje tjetër apo jo. Si situatë është delikate. Përhapja për 100 mijë banorë e një jave apo dy javëve pak rëndësi ka në ndjeshmërinë e qytetarit, por ajo që ka më shumë ndjeshmëri është dhe numri i të shtruarve në spitale. Kemi lënë shkollat online, fluturimet nga Anglia të pezulluara, kemi qenë të kujdesshëm në disa aspekte. Dy gjëra na ndihmojnë ta kuptojmë këtë situatë, numri më i gjerë i testimeve dhe testimet e kombinuara, pra testet të shpejta dhe atij të PCR, por dhe testet e bëra në privat. Kemi realizuar deri më sot 363 mijë testime PCR dhe 75 000 testime të shpejta. Ne jemi vigjilentë për të parë atë gjënë që nuk është jo e zakonshme, duke bërë dallimet mes virusit dhe gripit”, – shtoi ajo.
Fico tha se s’ka pasur numra të shtuar sa i takon gripit sezonal, ndërsa në këtë drejtim janë kryer 368 000 doza vaksine për të parandaluar gripin sezonal. “Gripi ka një transmetueshmëri më të ngadaltë, se Sars COV-2 dhe kjo është arsyeja që pse nuk kemi grip sezonal”, – tha Fico.
Duke folur për skenarin 14-mujor të vaksinimit, Fico deklaroi se është pikërisht plani mbi të cilin është fokusuar puna: “Skenari për të cilin jemi përgatitur dhe dëshirojmë, është që për 14 muaj të realizojmë vaksinimin. COVAX ka një kalendar specifik që thotë saktësisht se sa vaksina do të marrë çdo vend. Por, duke u nisur edhe nga situata e vonesave të Pfizer, është e parakohshme për të thënë që për 14 muaj do ta kryejmë. Ne do të vijojmë me planin tonë të vaksinimit, por duke pasur parasysh edhe llojin e vaksinës dhe efikasitetin e saj për grupmosha të caktuara”.
/a.r
