“Kam aq shumë para sa mund të paguaj dikë për të të vrarë dhe askush nuk do e merrte vesh. Askush nuk do të kujtohej për ty. Askush nuk do të dinte gjë”. Ish-producenti muzikor, Daniel Evans, thotë se nuk i janë shqitur nga mendja fjalët që ish-shefi i tij, Sean “Diddy” Combs – në atë kohë të njohur si Puff Daddy – i tha një kolegu. Ishte viti 1997, tregon ai në një intervistë për BBC, dhe ngjarja ndodhi në zyrat e shtëpisë diskografike të muzikantit në Nju-Jork.
Dikur një nga figurat më të fuqishme në hip-hop, Diddy tani përballet me akuza që kërcënojnë të fshijnë trashëgiminë e tij. Ish-manjati i muzikës ndodhet aktualisht në burg, duke pritur gjyqin për akuzat e trafikimit seksual dhe zhvatjes, së bashku me një numër padish që e akuzojnë për sulm seksual, drogim të grave dhe sjellje të dhunshme. Ndërsa ai mohon të gjitha akuzat, ish-kolegët e tij në Bad Boy Records tani po flasin për herë të parë rreth incidenteve shqetësuese që kanë dëshmuar në vitet 1990 dhe më tej.
Evans dhe ish-punonjës të tjerë përshkruajnë atë si një njeri që po gllabërohej nga pushteti, veçanërisht pasi mori një pagesë prej 6 milionë dollarësh për suksesin e kompanisë së tij.
Ngritja meteorike e Combs filloi në fillim të viteve 1990 kur themeloi Bad Boy Records pasi u pushua nga puna në Uptown Records. Marka shpejt u bë një fuqi e madhe me artistë si The Notorious B.I.G., por pas kuintave, punonjësit thonë se po krijohej një kulturë toksike, shkruan A2 CNN. Ish-anëtarët e stafit përshkruajnë një ambient ku sjellja e pahijshme seksuale, përdorimi i drogës dhe abuzimi me pushtetin ishin të zakonshme. Disa kujtojnë se kanë hyrë rastësisht në dhoma ku Combs kryente marrëdhënie seksuale, ndërsa të tjerë thonë se fondet e korporatës u përdorën për të sjellë gra nga vende të ndryshme për takime seksuale me artistë dhe drejtues.
Felicia Newsome, e cila menaxhoi studion e regjistrimit Daddy’s House nga 1994 deri në 2000, kujton një incident ku Combs i kërkoi një anëtari të stafit t’i sillte prezervativë ndërsa ishte vetëm me dy gra. Edhe pse ajo e kundërshtoi për këtë kërkesë të papërshtatshme, punonjës të tjerë thonë se kishin frikë të flisnin. Shumë nga të punësuarit në kompani ishin të rinj, dhe praktikantët – disa prej të cilëve ishin vetëm 14 vjeç – shpesh përfshiheshin në situata të papërshtatshme.
Me kalimin e viteve 2000, sjellja e Combs raportohet se u bë edhe më e shthurur dhe e pakontrolluar. Punonjësit përshkruajnë një kulturë të “seksit, drogës dhe rock ‘n’ roll-it” në “Daddy’s House”, ku gratë silleshin rregullisht për të festuar. Disa nga këto vende janë përmendur më vonë në padi që pretendojnë përdhunime dhe drogime, raporton BBC. Një grua, Crystal McKinney, pretendon se Combs e sulmoi seksualisht në studio në vitin 2003. Një tjetër padi pretendon se ai dhe dy bashkëpunëtorë përdhunuan një 17-vjeçare po atë vit. Ekipi ligjor i Combs i ka hedhur poshtë këto pretendime si të pavërteta dhe vazhdon të mbrojë pafajësinë e tij.
Shumë ish-bashkëpunëtorë të Combs ende e kanë të vështirë të pajtohen me këto akuza. Disa, si Jeffrey Walker, thonë se nuk panë kurrë një sjellje të tillë me sytë e tyre. Të tjerë, si Evans, ishin skeptikë derisa në vitin 2023 doli një video që tregonte Combs duke sulmuar fizikisht ish-partneren e tij, Casandra Ventura, në një korridor hoteli. Padi e Ventura kundër Combs, e cila pretendonte vite të tëra abuzimi dhe trafikimi seksual, u zgjidh brenda 24 orësh.
Ndërsa Combs përgatitet të përballet me gjyqin në maj, historitë nga ish-punonjësit e tij ngrenë pyetje serioze mbi të kaluarën e tij. Dikur i njohur për ambicien e tij të palodhur dhe aftësinë për të menaxhuar imazhin e tij publik, Combs ka ndryshuar disa herë emrin e artit – nga Puff Daddy në P Diddy dhe, më së fundmi, “Love”. Megjithatë, me akuzat që vazhdojnë të grumbullohen, shumë nga ata që dikur e adhuronin, tani pyesin nëse pushteti i tij thjesht i dha lirinë për të treguar se kush ishte në të vërtetë gjatë gjithë kohës.
