Ish-kreu i Shërbimit Informativ Shtetëror, Fatos Klosi ka dalë dje hapur në mbështetje të ndryshimeve kushtetuese. Mazhoranca socialiste dhe opozita parlamentare firmosën në 21 korrik një marrëveshje përmes së cilës kërkojnë hapjen e listave dhe heqjen e koalicioneve. Kjo nismë e shumicës dhe pakicës parlamentare kundërshtohet fuqishëm nga opozita jashtë parlamentare, e cila pretendon se kryeministri Edi Rama përmes këtyre ndryshimeve do të vrasë dhe kapë zgjedhjet e ardhshme parlamentare. Por në një prononcimi për gazetën “SOT”, zoti Klosi deklaroi dje se mbështet heqjen e koalicioneve, pasi sipas tij, ka ardhur koha që partitë e vogla e sidomos krerët e tyre të mos fshihen më pas Partisë Demokratike, duke i nxjerrë ata deputet. Për ish-kreun e SHISH hapja e listave dhe heqja e koalicioneve parazgjedhore është e domosdoshme, ndërsa theksoi se kushdo duhet të hyjë i vetëm në zgjedhje për të matur forcën, në mënyrë që edhe qytetarët shqiptarë ta kenë më të qartë se kush i përfaqëson. “Sa i takon hapjes së listave dhe heqjes së koalicioneve parazgjedhore unë e mbështes. Ka ardhur koha që të hapen listat dhe të hiqen koalicione parazgjedhore. Kjo pasi të dyja këto na tregojnë ne si qytetarë që të kemi mundësi të zgjedhim, por edhe të shohim e peshojmë vlerën e vërtetë të partive politike në Shqipëri. Pra, ka ardhur koha që partitë, qofshin të vogla apo të mëdha të fshihen pas koalicioneve parazgjedhore. Shefat apo kryetarët e partive të vogla kanë dalë deputetë nga partitë e mëdha dhe kjo është absurde. Kështu që me heqjen e koalicioneve, ne si qytetarë do të kemi mundësi të shikojmë realisht sa vlejnë edhe paritë e vogla pasi të jenë mbajtur zgjedhjet dhe i mbështes këto ndryshime kushtetuese”, deklaroi ai.
Mesazhet e Kim të udhëzuara nga DASH
Duke komentuar paralajmërimin e bërë dy ditë më parë nga ambasadorja e SHBA në Tiranë, Yuri Kim për të gjitha partitë politike që përgatiten për zgjedhje që të verifikojnë të gjithë kandidatët dhe të mos minojnë demokracinë me përzgjedhjet e gabuara, zoti Klosi u shpreh se ky është një mesazh që duhet përshëndetur. Në reagimin e tij për gazetën, ish-kreu i SHISH, Fatos Klosi theksoi se ambasadorja Kim flet në emër të Departamentit Amerikan të Shtetit dhe sipas tij, SHBA-të janë tejet të interesuara që në Parlament të mos hyjnë më persona me rekorde kriminale apo që nuk dinë të lidhin dy fjalë. “Ambasadorja e SHBA, Yuri Kim flet në emër të DASH dhe kërkon nga shefat e partive politike në Shqipëri që të jenë serioz në zgjedhjen e kandidatëve. Pra, SHBA kërkon që jo vetëm që në Parlament të mos futen njerëz të inkriminuar, por edhe njerëz që shkojnë në Parlament për tu ngrehur dhe që nuk kanë folur kurrë, madje që nuk e bëjnë punën e një parlamentare siç është ligjvënësi. Nga kjo pikëpamje dua të ndalem që zonja Yuri Kim ka bërë një kurs të zgjatur në senat përpara se të vinte ambasadore dhe ajo i di interesat amerikanë, kështu që edhe thirrja e saj vjen në emër të DASH. Si përfundim mua më pëlqen këshilla dhe thirrja e ambasadores Yuri Kim dhe po të isha unë në vend të shefave të politikës do ta falenderoja atë”, u shpreh ai.
Mesazhi i ambasadores është për krerët e partive
Më tej gjatë reagimit për gazetën, ish-kreu i Shërbimit Informativ Shtetëror, Fatos Klosi shprehu bindjen se thirrja e ambasadores amerikane, Yuri Kim shkon drejt për drejt për krerët e partive politike, pasi sipas tij, janë këta të fundit ata që përzgjedhin kandidatë për deputet dhe jo vetëm. “Thirrja e ambasadores amerikane, Yuri Kim që shefat e partive të kenë kujdes me emrat që përzgjedhin dhe i fusnin në Parlament është e mirëpritur dhe duhet mbështetur fuqishëm”, nënvizoi ish-kreu i SHISH, Fatos Klosi për gazetën “SOT”.
g.kosovari
