Një gjysh me 13 nipër e mbesa u vizitua në shtratin e vdekjes nga katër lojtarë rë Manchester United dhe familjarët e tij janë të bindur se ai i rezistoi vdekjes deri sa arriti t’i takonte ata.
Paddy Lawler, 73 vjeç, tifoz i çmendur i United, vdiq vetëm 45 minuta pasi katër lojtarët – Marcus Rashford, Jesse Lingard, Ashley Young e Timothy Fosu-Mensah – u larguan nga shtëpia e tij.
Lojtarët i bënë vizitë në përgjigje të një kërkese nga mbesa e Lawlerit në Facebook.
Kayleigh Lawler shkroi se gjyshi i saj ishte “tifoz i madh i Manchester United” dhe do të ishte i lumtur nëse i realizohej dëshira e fundit.
Një kushëri i Jesse Lingard, Robert Kilshaw, e vuri re postimin dhe rregulloi takimin surprizë të martën.
Futbollistët milionerë mbërritën me makinat e tyre luksoze dhe për rreth 30 minuta biseduan për klubin, pozuan për foto dhe nënshkruan fanella.
Mbesa, 27 vjeç, deklaroi për The Sun: “Gjyshi ishte tifoz i madh i Manchester United dhe kjo vizitë vlente sa gjithë bota për të. E pyeta se cila do të ishte dëshira e tij e fundit dhe më tha se do të donte të takonte disa lojtarë të United. Nuk na u besua që gjetën kohë për t’i plotësuar dëshirën e fundit një plaku që po vdiste. Ishte diçka shumë altruiste. Ai vdiq 45 minuta pasi ata u larguan dhe jemi të bindur se e luftoi vdekjen vetëm për t’i parë”.
Vejusha, Eunice, 71 vjeç, shtoi: “Ishin djem shumë të mirë dhe jemi të lehtësuar që vdiq i lumtur”.
Lawler, baba i katër fëmijëve, ish-hidraulik, humbi betejën 4-vjeçare me kancerin në prostatë pas takimit me lojtarët.
Idhujt e tij ndër lojtarët e Manchester United ishin magjistarët e krahut, Ryan Giggs e George Best.
Dailymail/d.i.
