Një ngjarje e denoncuar fillimisht si një incident pa pasoja me armë zjarri te “Komuna e Parisit”, mbrëmjen e djeshme, rezultoi më vonë plagosje me armë zjarri për borxhe.
Krimi ka ndodhur mbrëmjen e djeshme në kryeqytet, ku është plagosur me armë zjarri një 38-vjeçar. Policia njoftoi fillimisht se nuk kishte të lënduar, por hetimet e mëvonshme zbuluan personin e plagosur që ishte fshehur në banesën e tij. Mbrëmë në mesnatë, burimet e Policisë kanë thënë se shtetasi Flamur Cullhaj, 38 vjeç, ka mbetur i plagosur me armë në ngjarjen e ndodhur rreth orës 21:05, mbrapa një qendre tregtare.
Aty u raportua se një person, i cili udhëtonte në një automjet tip “BMW X5”, ngjyrë e zezë, ka qëlluar në drejtim të një personi tjetër, duke e lënë atë të plagosur, dhe më pas është larguar drejt zonës së Selitës. Policia tha mbrëmë pas verifikimeve të ngjarjes se i dëmtuar ka mbetur shtetasi Flamur Cullhaj, ndërsa autor i dyshuar i ngjarjes është shtetasi Klajdi Kodra.
Ky i fundit ka qenë në vendin e krimit vetë i dytë, pasi udhëtonte me makinë bashkë me një të afërmin e tij, shkruan Panorama.
“Shtetasi Flamur Cullhaj u gjet i plagosur në banesën e tij pas disa kërkimeve të bëra mbi bazën e informacioneve të marra në rrugë operative”, theksoi Policia mbrëmjen e djeshme.
Ndërsa autori i dyshuar i ngjarjes dhe personi me të cilin ai shoqërohej janë shpallur në kërkim nga Policia. Identifikimi i tyre mësohet se është bërë nga targat e automjetit me të cilin kanë ikur drejt Selitës, por edhe nga deklarimet e dëshmitarëve në vendin ku ndodhi konflikti me armë.
Pas njoftimit për krimin në sallën operative, Policia mbërriti aty dhe në vendngjarje u gjet fillimisht një gëzhojë, 7.65 mm, e më pas edhe disa të tjera.
Policia deklaroi fillimisht se nuk kishte marrë njoftime për persona të lënduar nga të shtënat me armë, por disa dëshmitarë u thanë hetuesve në vendin e ngjarjes, pranë një qendre tregtare të zonës, se kishin parë një të plagosur të largohej nga vendi i sulmit.
Për këtë arsye, Policia verifikoi në disa spitale të kryeqytetit ku nuk ishte paraqitur ndonjë i plagosur, ndërsa në mesnatë arriti të gjente të lënduarin Flamur Cullhaj. Ai raportohet se ka marrë dëmtime me armë zjarri, por, sipas mjekëve, është jashtë rrezikut për jetën. Policia tha mbrëmë se po heton në lidhje me shumën e borxhit që ka qenë shkak i konfliktit dhe do të përcaktojë se cila palë i detyrohet tjetrës, pasi ende nuk është i qartë ky fakt.
