Një ngjarje e rëndë ka tronditur kampusin e Universitetit Shtetëror të Kentucky-t (KSU) në Frankfort (SHBA), ku një student ka humbur jetën dhe një tjetër ndodhet në gjendje kritike, pas të shtënave me armë zjarri.
Policia e qytetit njoftoi se një person i dyshuar, i cili nuk është student i universitetit, është arrestuar menjëherë pas incidentit. Ngjarja ndodhi të martën pasdite në një konvikt në pjesën jugore të kampusit, ndërsa autoritetet vendosën izolimin e menjëhershëm të universitetit duke thënë se po i përgjigjeshin një “agresori aktiv”.
Siç shkruan CNN, guvernatori i Kentucky-t, Andy Beshear, reagoi i pari duke e cilësuar dhunën të papranueshme dhe duke u bërë thirrje qytetarëve të luten për familjet e prekura dhe studentët e KSU-së. Ai falënderoi forcat e rendit për ndërhyrjen e shpejtë.
Policia e Frankfort-it, policia e kampusit dhe Sherifi i Qarkut Franklin morën pjesë në operacion, ndërsa autoritetet lokale, shtetërore dhe federale po ndihmojnë në hetimet. Zyrtarët e KSU-së deklaruan se, për respekt ndaj studentëve dhe familjeve, nuk do të publikojnë informacione identifikuese apo mjekësore.
“Për respekt ndaj studentëve dhe familjeve të tyre, Universiteti nuk do të publikojë informacione identifikuese ose mjekësore shtesë në këtë kohë,” tha KSU në faqen e internetit. “Ne jemi në kontakt të ngushtë me familjet dhe po u ofrojmë çdo mbështetje të mundshme.”
Universiteti ka anuluar mësimet, provimet finale dhe aktivitetet e kampusit për pjesën tjetër të javës, duke u dhënë studentëve mundësinë të kthehen në shtëpi. Presidenti i KSU-së, Koffi C. Akakpo, e quajti ngjarjen një “tragjedi pa kuptim” dhe shprehu dhimbjen e tij si prind për telefonatat që iu desh t’i bënte familjeve të viktimave.
“Si prind që jam vetë, nuk mund ta imagjinoj marrjen e telefonatës që bëra sot tek prindërit,” tha ai.
Shërbime këshillimi dhe mbështetje po ofrohen për studentët, pedagogët dhe stafin e prekur. Alakpo tha se agjencitë lokale, shtetërore dhe federale tani po ndihmojnë në hetim.
Kampusi i KSU-së shtrihet në rreth 1 mijë hektarë dhe numëron mbi 2 mijë e 200 studentë dhe 450 punonjës akademikë e administrativë.
