Faktorët që ndikojnë negativisht në shëndetin e arterieve dhe zemrës sonë nuk janë vetëm stresi, një stil jetese jokorrekt, sedentarizmi, por edhe ajo që ne hamë. Dhe shpesh, edhe pse mundohemi të tregohemi të kujdesshëm, konsumojmë ushqime që përmbajnë sasi shumë të lartë kripe.
Ushqimet që mund të shkaktojnë probleme, si për shembull hipertension, janë të shumta, por ekspertët zbulojnë 6 më të përhapurat dhe më të konsumuarat. Sipas ekspertëve kardiologë, janë disa elementë që mund të konsiderohen si burimi kryesor i kripës në dietën tonë.
Për më tepër, kripa është cilësuar si një nga shkaqet kryesore të sëmundjeve kardiovaskulare dhe sëmundjeve të qarkullimit të gjakut që rrit rrezikun e atakut kardiak dhe iktusit. Sasia e kripës, sipas rekomandimeve është fiksuar në jo më shumë se 2.300 miligramë në ditë. Por, për të qenë më të shëndetshëm nuk duhet t’i kalojë 1.500 miligramët. Më poshtë do t’ju tregojmë 6 ushqimet armike të hipertensionit, të cilat përmbajnë sasi të mëdha kripe.
BUKA
Buka mund të mos duket shumë e kripur, por pikërisht një fetë bukë mund të përmbajë deri në 230 mg, çka do të thotë rreth 15 për qind e sasisë ditore të rekomanduar.
MISHI I KONSERVUAR
Produktet me bazë mishi të konservuar, siç janë sallamet dhe proshutat, përmbajnë një sasi shumë të lartë kripe. Kjo sepse ndihmojnë konservimin dhe ruajtjen e tyre sa më gjatë. Mes produkteve të ndryshme, mishi i bardhë në kuti mund të përmbajë deri në 1.050 mg kripë, një përqindje shumë e lartë.
PULA E NGRIRË
Produktet me bazë mishin e ngrirë të pulës mund të përmbajnë sasi të ndryshme kripe, në bazë të vetëpërgatitjes. Krahët apo kofshët e pulës të skuqura që tregtohen nëpër fast-food-e, mund të përmbajnë secila rreth 600 mg kripë.
SANDUIÇI
Paninet që përdoren për hamburger, për shembull, janë më të këqijat. Sepse jo vetëm që janë vetë të kripura, por në përgjithësi mbushen me mish të konservuar dhe produkte të tjera, të gjitha shumë të pasura me kripë. Në përgjithësi një panine mund të përmbajë deri në 1.500 miligramë kripë.
PICA
Fetat klasike të picës, në dukje të “pafajshme”, që askush nuk ngurron t’i gëlltisë me një frymë gjatë pushimit në punë, mund të përmbajnë deri në 760 mg kripë, shoqëruar kjo nga një përqindje e lartë yndyre dhe kalorish.
SUPA
Edhe supat, sidomos kutitë që gjenden gjysmë të gatshme në supermarket, mund të jenë shumë të pasura me kripë. Një racion i tyre, mund të përmbajë deri në 940 mg kripë. Me pak fjalë, përveç ushqimeve që dihen që duhen eliminuar, sidomos nga personat me tension të lartë të gjakut, burimet e kripës mund të jenë edhe ushqimet që deri më tani nuk ishin marrë në konsideratë. Kështu, pa e kuptuar fare mund ta gjesh veten me probleme kardiovaskulare e ndoshta duke menduar se je duke ndjekur një dietë korrekte.
BW/d.i.
