Stafi mjekësor palestinez në Gaza i ka rrëfyer BBC-së torturat izraelite pas një bastisjeje në spitalin e tyre muajin e kaluar. Në dëshminë e tyre ata thonë se iu ishin lidhën sytë, u arrestuan, u detyruan të zhvishen dhe u rrahën vazhdimisht nga trupat izraelite.
Ahmed Abu Sabha, një mjek në spitalin Nasser, deklaroi se ishte mbajtur për një javë në paraburgim dhe dora e tij ishte thyer nga një ushtar izraelit.
Dëshmia e tij përputhet ngushtë me ato të dy mjekëve të tjerë që donin të mbeten anonimë nga frika e hakmarrjeve.
Ata i thanë BBC-së se u poshtëruan, u rrahën, u lanë me ujë të ftohtë dhe u detyruan të gjunjëzoheshin në pozicione të pakëndshme për orë të tëra. Ata thanë se ishin ndaluar për ditë të tëra para se të liroheshin.
Këto pretendime BBC ia komunikoi edhe Forcave të Mbrojtjes të Izraelit (IDF). Por ata nuk iu përgjigjën drejtpërdrejt pyetjeve, ose mohuan pretendimet për keqtrajtim. Ata mohuan që stafi mjekësor të jetë dëmtuar gjatë operacionit të tyre.
Sipas tyre “çdo abuzim i të burgosurve është në kundërshtim me urdhrat e IDF dhe për këtë arsye është rreptësisht i ndaluar”.
IDF bastisi spitalin në qytetin jugor të Gazës, Khan Younis, i cili ishte një nga të paktët në Rripin që ende funksiononte, më 15 shkurt, duke thënë se inteligjenca tregoi se spitali strehonte operativë të Hamasit.
Ata gjithashtu thanë se pengjet izraelitë të marrë nga Hamasi më 7 tetor ishin mbajtur atje dhe disa nga vetë pengjet kanë thënë publikisht se ishin mbajtur në Nasser. Hamasi ka mohuar që luftëtarët e tij veprojnë brenda objekteve mjekësore.
Pamjet e filmuara fshehurazi në spital më 16 shkurt, ditën kur mjekët u ndaluan, u ndanë me BBC.
Ato tregojnë një varg burrash të zhveshur me të brendshme përpara godinës së urgjencës së spitalit, të gjunjëzuar me duart pas kokës.
“Kushdo që u përpoq të lëvizte kokën ose të bënte ndonjë lëvizje u godit,” tha për BBC menaxheri i përgjithshëm i spitalit, Dr Atef Al-Hout. “Ata i lanë për rreth dy orë në këtë pozicion të turpshëm”.
IDF i tha BBC-së: “Si rregull, gjatë procesit të arrestimit, shpesh është e nevojshme që të dyshuarit për terrorizëm të dorëzojnë rrobat e tyre në mënyrë që rrobat e tyre të kontrollohen dhe të sigurohen që ata të mos fshehin jelekët shpërthyes ose armë të tjera.
“Rrobat nuk u kthehen menjëherë të arrestuarve, për shkak të dyshimit se ato mund të fshehin mjete që mund të përdoren për qëllime armiqësore. Të arrestuarve u kthehen rrobat kur është e mundur.”
Stafi mjekësor tha se më pas ata u dërguan në një ndërtesë spitali, u rrahën dhe më pas u transportuan në një institucion paraburgimi, të gjithë të zhveshur.
/a.r
