Të rinjtë e “Call Center” ngrenë zërin për të drejtat e tyre
Në kuadër të fushatës globale “ Youth Voice” dhe Ditës Ndërkombëtare të Rinisë, shoqata “Together for Life” organizoi një aktivitet në një Call Center në kryeqytet. Qëllimi i këtij aktiviteti ishte bashkëbisedimi me të rinjtë që punojnë në këto biznese lidhur me të drejtat e tyre, respektimin e të drejtave nga punëmarrësit dhe për problemet me të cilat ata përballen. Me ta u fol edhe lidhur me angazhimin që duhet të kenë institucionet për t’i dhënë më shumë hapësirë rinisë, por gjithshtu edhe me vullnetin që duhet të tregojnë vetë të rinjtë për të qenë më aktiv dhe më pjesëmarrës në zhvillimet e vendit.
Gjatë bashkëbisedimit, Eriol Lazaj, i diplomuar në degën “Menaxhim biznes”, i cili punonte si supervizor tek “SOS Tariffe”, tha se të rinjtë shqiptarë kanë nevojë për arsimim cilësor dhe për më shumë vende pune (sigurisht edhe rregullsi në paga). Ai u shpreh se puna në Call Center për secilin nga të rinjtë nuk është një profesion për të ardhmen, por më tepër një mundësi për të ecur përpara deri në momentin kur do të arrijnë të jenë në profesionin për të cilin janë arsimuar.
Në fund të bashkëbisedimit të rinjtë dhanë mesazhet e tyre, të qarta përsa i përket të drejtave, problemeve dhe dëshirave që kanë. Nëpërmjet veshjes së bluzave me simbolin e megafonit, ata dhanë edhe një mesazh të përbashkët: Të gjithë të rinjtë duhet të çojnë zërin për të drejtat e tyre.
Rreth 10 mijë të rinj, që kanë mbaruar universitetin, sot punojnë në kompani call center-i. Shumë prej tyre e shikojnë këtë punë si një alternativë të mirë për të fituar para e ndërsa shumë të tjerë e konsiderojnë si profesion. Bizneset e call center-it në Shqipëri zenë vendin e dytë për numrin e të punësuarve, ku pjesa më e madhe janë të diplomuar dhe njohës të gjuhëve të huaja.
