Rritja e numrit të të infektuarve për shkak të Deltës ka bërë që të ezaurohen 76 % e kapaciteteve të Spitalit Infektiv dhe atij Covid 3, i njohur ndryshe si ish-Kirurgjia e vjetër.
Sipas mjekëve, numri i të shtruarve në spital për shkak të Covid po rritet ndjeshëm, kryesisht nga personat e pavaksinuar.
“Po rritet ndjeshëm numri i të shtruarve në spital. Kemi nga mosha 20 vjeç deri në moshën e tretë. Shumica prej tyre janë të pavaksinuar”.
E pyetur nëse ka persona të vaksinuar që kanë humbur betejën me Covid, mjekja e Spitalin Infektiv Covid 1, Elda Qyra, thotë se janë raste të pakta dhe kanë ardhur si pasojë e sëmundjeve bashkëshoqëruese.
“Patjetër që ka raste, janë shumë pak persona të vaksinuar që kanë humbur jetën. Por kanë edhe dy tre sëmundje të tjera bashkëshoqëruese si obezitet dhe jo obezitet në formë të një personi pak mbi peshë, por obezitet të theksuar”.
Tirana dhe Elbasani kanë numrin më të lartë të qytetarëve të shtruar në spital, të ndjekur nga Durrësi dhe Fieri.
/a.r
