Vlora ka 1300 të papunë të regjistruar në Zyrën e Shërbimit Kombëtar të Punësimit, por ka edhe një numër të madh të refuzimeve për të pranuar punën që ofrohet. Në një intervistë me gazetën Shekulli, drejtoresha e Zyrës, Marjana Cani, thotë se tregu i punës ofron 500 vende të lira pune, por ato nuk plotësohen për shkaqe dhe faktorë të ndryshëm.
Cani sqaron se, mjaft prej atyre që janë regjistruar në sistemin “online” të institucionit, e bëjnë këtë thjesht për të përfituar shërbime, si libreza shëndeti e bursa studimi për fëmijët, por kur vjen puna për të shkuar në vendet që u ofrohen, nuk pranojnë.
“Pjesën më të madhe, sigurisht që e zënë “call center”, si dhe shërbimet turistike, por ka edhe vende pune të lira pranë marketeve, si shitës, arkëtarë, ashtu sikundër kërkohen edhe mekanikë, elektricistë, madje edhe farmacistë e inxhinierë, apo ekonomistë”, thotë Cani për Shekullin.
“Por, ajo që për ne është shqetësuese, lidhet me refuzimin e një pjese të madhe të atyre që kontaktojmë. Refuzojnë për arsye të ndryshme, të tilla si largësia e vendit të punës, ose edhe mungesa e interesit. Kjo tregon se, një pjesë tyre vijnë te ne thjesht për të përfituar shërbime administrative, si librezën e shëndetit, për përfitim bursash etj. Një pjesë e madhe e tyre, vijnë thjesht për të marrë shërbime dhe deklarohen si punëkërkues”.
Cani shton edhe se, bazuar mbi një vendim qeverie, personi që refuzon punësimin largohet automatikisht nga sistemi, duke mos u quajtur më punëkërkues, dhe humbet shërbimet administrative.
Shekulli
