Një raport i fundit i Bankës Botërore e rendit Shqipërinë në vendet më të ulëta, sa i takon nivelit të arsimit. Sipas raportit universitetet shqiptare po diplomojnë studentë të papërgatitur, që nuk plotësojnë standardet e tregut të punës brenda dhe jashtë vendit.
Marrë shkas nga ky raport, eksperti i arsimit, Ndriçim Mehmeti, në studion lëvizëse të “Aldo Morning Show” në Tv Klan tha se shkak kryesor për këtë është mungesa e orientimit dhe infrastrukturës.
Për më tepër eksperti shtoi se duhet të ndjehemi të turpëruar, për renditjen e ulët të Shqipërisë në Ballkan ,për përdorimin e gjuhëve të huaja. Sipas Mehmetit, jemi të fundit!
Aldo: Na tërhoqi dje vëmendjen një raport i Bankës Botërore në lidhje me arsimin. Sipas tyre universitetet shqiptare po përgatisin studentë të papërgatitur për realitetin e tregut të punës për shkak të infrastrukturës së dobët dhe mungesës së kërkimit shkencor, duke thelluar hendekun me vendet më të zhvilluara. Pse çdo vit diplomohen kaq shumë studentë që mesa duket sipas Bankës Botërore nuk qenkan kaq të aftë për tregun e punës, kush e ka fajin?
Ndriçim Mehmeti: Ka një seri faktorësh. Shumë njerëz thonë që na mjafton vetëm diploma, por ne kemi 12 vjet që diskutojmë, që nuk kemi as orientim dhe as infrastrukturë. Madje për turpin tonë, e dini ju që ne jemi të fundit në Ballkan për përdorimin e gjuhës së huaj?!
Aldo: Për anglishten?
Ndriçim Mehmeti: Si raport po! Ne jemi të fundit.
Eksperti shton më tej se pjesa më e madhe e të rinjve dhe studentëve nuk dinë të përdorin kompjuterin dhe kanë aftësi shumë minimale në fushën dixhitale. Shkak kryesor sipas tij në këtë ngërç të madh të sistemit të arsimit është buxheti shumë i ulët që shteti ka vendosur.
Aldo: E kanë futur që në kopsht, si ka mundësi!
Ndriçim Mehmeti: Po fute që në çerdhe ti po deshe, puna është se sa efektivitet ka. Nuk ka efektivitet sepse bëhet vetëm në Tiranë, Durrës dhe Elbasan, kurse në vendet e tjera nuk ka mësues. Një pjesë e madhe nuk dinë kompjuterin, sepse nuk ka infrastrukturë. Aftësitë dixhitale të të rinjve shqiptarë janë vetëm 20%, sepse nuk kemi infrastrukturë. Ne jemi i vetmi vend që nuk kemi një kampus studentor. Po marr shembull këto vendet e vogla rreth nesh. 1.8 të GDP-së harxhon Sllovenia, kurse ne harxhojmë 0.03 të GDP-së për kërkimin shkencor.
Aldo: Po e thua si batutë apo kaq është?!
Ndriçim Mehmeti: Jo kaq është të betohem, sepse ne të gjithë buxhetin e arsimit e kemi 2.54% të GDP-së. Ndërkohë që vendet e tjera e kanë minimalisht 5%.
