Ministrja italiane e Turizmit, Daniela Santanchè, dha një ditë më parë dorëheqjen me kërkesë të kryeministres Giorgia Meloni, pas humbjes së qeverisë në referendumin e tre ditëve më parë për reformën në drejtësi.
Pasi i rezistoi fillimisht kërkesës për dorëheqje, Santanchè më në fund bëri me dije se do të largohej nga posti, në përputhje me dëshirat e udhëheqëses së partisë së saj “Vëllezërit e Italisë”, por duke këmbëngulur se nuk duhej fajësuar për dështimin në referendum.
Dorëheqja e Santanchè erdhi pasi dy zyrtarë të lartë të Ministrisë së Drejtësisë u larguan gjithashtu nga detyra, çka duket të jetë një përpjekje e koordinuar e Melonit për rifreskimin e ekzekutivit pas humbjes në referendum.
Santanchè ndërkohë dyshohet për falsifikim të librave të llogarisë së grupit botues që zotëronte dikur, dhe prokurorët po kërkojnë që ta vënë nën akuzë edhe për mashtrim, për përfitim të fondeve të COVID-19 nga e njëjta kompani.
Ish-ministrja e Turizmit gjithashtu është nën hetim për dy çështje, një prej të cilave ka lidhje me falimentimin e rremë të një kompanie ushqimesh organike që drejtonte dikur.
Dy zyrtarët e Ministrisë së Drejtësisë që janë dorëhequr janë ish-nënsekretari i atij dikasteri, Andrea Delmastro, aleat i ngushtë i Melonit, për të cilin mediat raportuan se ka aksione në një restorant të lidhur me mafian, si dhe tashmë ish-shefja e stafit të ministrisë, Giusi Bartolozzi, e cila para referendumit u kishte kërkuar votuesve të mbështesnin reformën në drejtësi, të cilën ndërkohë e përshkroi si “skuadër pushkatimi”.
