Të miturit që vuajnë apo presin dënimin në Qendrën e Riintegrimit të të Miturve në Kavajë kanë prodhuar dollapë, në punishten e kësaj qendre, të cilët do të përdoren nga gratë e paraburgosura e të burgosura në Institucionin e Ekzekutimit të Vendimeve Penale “Ali Demi”, në Tiranë. Ky është një projekt i Prezencës së OSBE-së në Shqipëri, që ka për qëllim, nga njëra anë, përmirësimin e kushteve të grave në burg dhe, nga ana tjetër, mbështetjen e arsimit profesional të shkelësve të ligjit. Ideja, e zhvilluar së bashku me Drejtorinë e Përgjithshme të Burgjeve, lindi pas një vizite të Prezencës në burgun e “Ali Demit”, ku u vërejt se gratë nuk kishin dollapë të mjaftueshëm për sendet e tyre. Ndërkohë, Qendra e Riintegrimit në Kavajë kishte një punishte për punën me dru, por të miturit nuk mund të ushtroheshin në të, për shkak të mungesës së materialeve drusore, që u siguruan, më pas, Prezenca e OSBE-së.
Për të parë punën e të miturve dhe kushtet në të cilat jetojnë ata, Kryetari i Prezencës, ambasadori Florian Raunig, zhvilloi dje një vizitë në Qendrën e Riintegrimit në Kavajë. Të pranishëm ishin edhe Drejtori i Përgjithshëm i Burgjeve, Artur Zoto, drejtorja e burgut “Ali Demi”, Zoja Jakaj, si dhe drejtori i burgut të Lezhës. Në një takim me personelin e Qendrës së Riintegrimit, Raunig tha se burgu duhet të jetë alternativa e fundit dhe theksoi rëndësinë e dënimeve alternative, sidomos te të miturit, si një mënyrë që ndihmon riintegrimin e tyre në shoqëri, si dhe ul kostot për shtetin. Ai tha se Prezenca do të vijojë të mbështesë Drejtorinë e Përgjithshme të Burgjeve dhe Drejtorinë e Përgjithshme të Shërbimit të Provës.
