Nga Mero Baze
Lulzim Basha ka akuzuar Edi Ramën se i ka vjedhur idenë për shkollat 9-vjeçare me drekë, ku fëmijët do të qëndrojnë për studim në orët e pasdites deri në orën 16:00. Si provë, ai ka paraqitur një deklaratë të tij në qershor të vitit 2024, ku kërkon që shkollat 9-vjeçare të jenë me drekë dhe premton se këtë do ta realizojë partia e tij, Demokratike Euroatlantike.
Me të njëjtën egërsi ka reaguar edhe Adriatik Lapaj, i cili pretendon se Edi Rama i ka kopjuar programin e partisë dhe i ka marrë idenë për shkollat me drekë.
Sikur të mos mjaftonin këta të dy, edhe Arlind Qori ka akuzuar Erion Veliajn se, duke u dhënë të gjithë pensionistëve të Tiranës abone falas, i ka vjedhur idenë për pensionistët. Siç e shihni, radhët për të marrë abonetë falas ia kalojnë radhëve të pensioneve.
Pas akuzave të rënda që opozita ka bërë ndaj qeverisë Rama për korrupsion dhe vjedhje fondesh, kjo valë e re e akuzave për vjedhje idesh është më simpatike.
Është simpatike, sepse, për shkak të vizibilitetit të lartë që ka Edi Rama në opinionin publik, kjo është një rast i mirë që edhe këto parti të tjera të tregojnë pjesë nga programi i tyre, duke u përplasur me Edi Ramën. Përndryshe, idetë e tyre mund të mbeten në program dhe askush të mos i marrë vesh.
Unë, për shembull, jam mbështetës i Lulzim Bashës, por nuk e kam pasur mendjen kur e ka thënë këtë premtim. Ndoshta ngaqë nuk kam më fëmijë në shkollë.
Adriatik Lapajn e kam shumë të fiksuar si njeri të inatosur me qeverinë, që bërtet shpesh. Po të isha nxënës, nuk do ta kisha dëgjuar këtë premtim, se do të kisha futur kokën poshtë bankës nga frika e të bërtiturave të tij.
Por e besoj që e ka shkruar në program.
Arlind Qorin e besoj plotësisht që do t’ua japë çdo gjë falas pensionistëve, sepse beson se ata janë të vetmit që ruajnë të paprekur nostalgjinë e kohës së komunizmit në Shqipëri.
Por nuk e kuptoj pse janë xhindosur që Edi Rama po e bën realitet ëndrrën e tyre. Sepse Edi Rama nuk po e premton. Po e bën. Pensionistët po udhëtojnë falas në autobusë. Nxënësit do të fillojnë të kenë shkolla me drekë.
Nëse ata vërtet ua duan të mirën nxënësve dhe pensionistëve (sidomos pensionistëve), duhet të gëzohen që qeveria po i bën realitet ëndrrat e tyre dhe që pensionistët nuk do të presin derisa të fitojë Partia e Arlind Qorit që të udhëtojnë falas, pasi ndërkohë po udhëtojnë falas. Dhe as nxënësit nuk do të presin që Lapaj apo Basha të bëjnë koalicion për të mundur Ramën që të hanë drekë falas në shkollë.
Ata mund të deklarojnë të qetë në fushatë që Edi Rama ka përmbushur disa pika të programit të tyre. Kjo tregon se ata përputhen në disa pika, por këto idetë e shërbimeve sociale në qytet nuk janë as ide të reja, as ide të patentuara nga disa djem të rinj që duan të hyjnë në politikë në Shqipëri. Janë ide që kanë më shumë se 60 vjet që qarkullojnë dhe zbatohen në Perëndim.
Kështu që nuk mund të kërkojnë të drejta autori. Thjesht mund të falënderohen si mbështetës të projektit të qeverisë për nxënësit dhe pensionistët. Dhe deri më 11 maj mund të ketë edhe pika të tjera të programit që mund të përputhen me ato të qeverisë Rama. Kështu që mund të kenë edhe raste të tjera për t’u gëzuar.
Pastaj, më 11 maj, çfarë të kenë, të kenë. Po të paktën të jenë të qetë për nxënësit dhe pensionistët që i kanë merak.
