Shqipëria po vijon të tërheqë një numër në rritje të shtetasve të huaj. Deri në fund të qershorit të këtij viti, në vend rezultojnë të miratuara rreth 39 mijë leje qëndrimi për shtetas të huaj.
Të dhënat e Policisë së Shtetit tregojnë se punësimi është arsyeja kryesore e qëndrimit të të huajve në Shqipëri. Në total, janë miratuar afro 22 mijë e 700 leje për punësim, përmes lejeve unike për punëmarrës dhe lejeve unike për të vetëpunësuar. Kjo shifër përbën rreth 59% të të gjitha lejeve aktive të qëndrimit.
Në krye të shtetasve të huaj të pajisur me leje unike për punësim janë ata nga Filipinet, India dhe Egjipti. Vetëm këto tre shtetësi kanë së bashku 10 mijë e 258 leje unike për punëmarrës, duke përbërë rreth gjysmën e totalit të lejeve të kësaj kategorie.
Shtetasit e Kosovës vijojnë të kenë numrin më të madh të lejeve aktive të qëndrimit në Shqipëri, me 19%, ndërsa pas tyre renditen italianët me 11% indianët me 10%, Filipinasit me 9.3%, dhe Egjiptianët me 8%.
Përtej punësimit, një tjetër arsye e rëndësishme e qëndrimit është bashkimi familjar, me mbi 7 mijë e 100 leje aktive ku vendin e parë e zë Kosova me 42% e ndjekur nga Italia me 11% dhe Turqia me 7%. Ndërkohë, lejet për studim janë mbi 1 mijë e 200 ku kryesojnë Italianët me 37% të tyre.
Shifrat tregojnë se tregu shqiptar i punës po mbështetet gjithnjë e më shumë edhe te fuqia punëtore e huaj, veçanërisht nga vendet e Azisë dhe të Lindjes së Mesme.
