Nuk ka paqe në PS. Edhe në ditët e prologut të fushatës elektorale për zgjedhjet lokale, sherri i heshtur socialist ka dalë në sipërfaqe sërish me të njëjtën teknologji, por me personazhe të ndryshëm.
Kësaj rradhe është sërish Ben Blushi i cili botoi letrën e hapur të rradhës, në të cilën edhe pse nuk përmendej me emër, të gjitha shigjetat i drejtoheshin Edi Ramës. Kjo është një përpjekje për ta tërhequr Ramën në një debat, të cilin deri më tani ai e ka refuzuar. Duke e injoruar sikur nuk ka ndodhur asgjë apo dhe duke “sponsorizuar” zëra të veçantë brenda PS-së për ta kundërshtuar.
Ajo që vihet re është se ndonëse Blushi po artikulon akuza specifike, në to ai nuk është i vetëm. Ndarja që ai i bën me ironi të majtës në krenaristë e kanabistë, në fakt mund të shtohet dhe me një kategori tjetër: të heshturit. Janë ata që mendojnë njëlloj si ai, por që nuk flasin.
Çfarë e bën kompakt këtë grup, pa emra për momentin dhe natyrisht edhe të pastrukturuar, është fakti që pjestarët e tij janë të papërfaqësuar në qeverisje. Shumica e tyre vijnë nga PS-ja tradicionale. Sinjalet e para të kundërshtisë janë dhënë.
Ato presin gjithsesi një rezultat të paqartë në zgjedhjet lokale për t’u bërë së paku më të dukshme. E vetmja gjë që është e qartë, mbetet bindja se e majta, edhe kur kundërshtari është në gjunjë dhe i përgjumur, problemet e saj di t’i krijojë vetë mrekullisht.
Redaksia Online
(Javanews.al)
