Më 9 Dhjetor, 7 shkolla në kryeqytet nuk do të hapin dyert për zhvillimin e procesit mësimor. Nxënësit do të zhvillojnë mësim në shkollat pritëse të padëmtuara nga tërmeti i 26 Nëntorit.
Më 9 Dhjetor pritet të rifillojë procesi mësimor për qarkun e Tiranës. Në shkollën Sami Frashëri është vendosur shiriti për shkak të dëmeve që ka pësuar nga tërmeti i 26 Nëntorit. 1400 nxënësit e kësaj shkolle do të zhvillojnë mësim në shkollën “Qemal Stafa” dhe “Sinan Tafaj”.
Po ashtu edhe rreth 900 nxënësit dhe 42 mësuesit e shkollës 9-vjeçare “Lasgush Poradeci“ në Kombinat do të zhvillojnë mësim në një tjetër shkollë. Ndërsa rreth 800 nxënës dhe 36 mësues të shkollës 9-vjeçare “Musine Kokalari“ do të zhvendosen tek shkolla “Betim Muço”, aty ku strehohen disa familje të pastreha nga tërmeti i 26 Nëntorit.
Tërmeti i fortë që goditi Durrësin, Tiranën dhe Thumanën shkaktoi dëme të mëdha edhe në shkolla të tjera. Sipas të dhënave nga grupet e verifikimit në terren dëmtime ka patur edhe në shkollën e mesme të bashkuar Pezë, shkollën 9-vjeçare “Pezë e vogël”, shkolla 9-vjeçare “Ramazan Jarani”, shkolla 9-vjeçare “Emin Duraku”, si dhe një kopësht në Tufinë.
Ministria e Arsimit bën me dije se rreth 4800 nxënës dhe 650 mësues të prekur nga tërmeti kanë shtëpi të dëmtuar apo të pabanueshme. /e.s/
