Lajmi se Prokuroria e Posaçme Kundër Korrupsionit dhe Krimit të Organizuar po heton 10 ish-gjyqtarë të Gjykatës së Lartë dhe Kushtetuese që u shkarkuan nga vetingu për fshehje të pasurisë është përshëndetur dje nga ish-kreu i Shërbimit Informativ Shtetëror, Fatos Klosi.
Ky i fundit gjatë një prononcimi për gazetën “sot”, u shpreh dje se hetimi i të ngelurve në veting është një lajm i mirë, ndërsa theksoi se ky veprim i SPAK është një sinjal për kastën e të korruptuarve se kohës kur ishin imunë ndaj drejtësisë po i vjen fundi.
Sipas zotit Klosi, çdo gjyqtar dhe prokuror që nuk justifikon pasurinë duhet të hetohet. “Nisja e hetimeve për 10 ish-anëtarë të Gjykatës së Lartë dhe Kushtetuese që kanë ngelur në veting nga ana e Prokurorisë së Posaçme Antikorrupsion është një lajm i mirë.
Kjo lëvizje e SPAK është një lëvizje që unë e shikoj siç e presin të gjithë shqiptarët që kushdo nga gjyqtarët dhe prokurorët që kanë ngelur në veting duhet të japin llogari. Kjo pasi të ngelësh në veting do të thotë se ata nuk kanë qenë në rregull me parametrat që kërkon ligji, kështu që nisja e hetimeve për ta duhet përgëzuar dhe përshëndetur.
Pra, nëse një gjyqtar apo prokuror nuk është në rregull, nuk justifikon pasurinë, natyrshëm duhet të hetohen dhe japin llogari. Kjo do të thotë se SPAK po i jep një mesazh të gjithë të korruptuarve se në këtë vend drejtësia tani po lëviz dhe nuk e kanë më të lehtë që të vjedhin apo të ushtrojnë korrupsion”, deklaroi ai.
Më tej, ish-kreu i SHISH theksoi se SPAK duhet të shtojë forcën goditëse, ndërsa kërkoi që në skanerin e drejtësisë së re të vihen edhe prokurorët dhe gjyqtarët e tjerë të ngelur në veting, duke qenë se numri i tyre shkon diku tek 90. “Nuk ka rëndësi numri se sa prokurorë dhe gjyqtarë kanë ngelur në veting qofshin këta 90 apo 100.
Kjo është e parëndësishme. E rëndësishmja është që SPAK po jep një mesazh që reforma në drejtësi nuk është bërë kot, nuk është e dështuar siç pretendon opozita. Kështu që, për mua nisja e hetimeve për gjyqtarët dhe prokurorët që kanë ngelur në veting është një lajm i mirë dhe uroj që kësaj çështje t’i shkojnë deri në fund”, u shpreh ai.
Por hetimi i gjyqtarëve dhe prokurorëve të ngelur në veting nuk është e vetmja strategji që duhet të ndjekë Prokuroria e Posaçme Kundër Korrupsionit dhe Krimit të Organizuar.
Ish-kreu i SHISH, Fatos Klosi i bëri thirrje SPAK që të shtrijë hetimet edhe tek zyrtarët, ndërsa shprehu bindjen se ka ardhur koha që të hapen dosjet e politikanëve dhe pushtetarëve të korruptuar.
“Nëse sistemi gjyqësor është gati dhe i ka njerëzit mendoj se ka ardhur koha që të hetohen edhe pushtetarët e korruptuar që deri më dje kanë qenë të paprekshëm.
Pra, nëqoftëse vendet bosh që lanë gjyqtarët dhe prokurorët e shkarkuar nga vetingu po mbushen, mendoj se ka ardhur koha që SPAK të vihet në lëvizje. Nuk ka më kohë dhe boll kemi pritur.
Ka ardhur koha që pushtetarët, politikanët dhe ish-zyrtarët e korruptuar të japin llogari. Ideja e reformës në drejtësi nuk është thjesht për të dënuar, por është një ide që të japë një mesazh se ky shtet nuk lejon më që njerëzit të bëjnë çfarë të duan me pasurinë publike dhe detyrat që iu ngarkon ligji.
Kudo jepet llogari edhe në politikë edhe në njerëzit e gjyqësorit. Pra, ky është një mesazh që nuk do të ketë më gallatë dhe se të korruptuarit duhet të japin llogari para drejtësisë”, nënvizoi ish-kreu i SHISH, Fatos Klosi.
Ke te drejt