Teksa gjithë bota “zien” nga frika e një lufte të mundshme bërthamore, duket se presidenti rus Vladimir Putin është më i relaksuar për këtë çështje.
Kjo u vërtetua gjatë daljes së tij të fundit, ku ai guxoi madje të tallej e të bënte shaka me përdorimin e armëve bërthamore. I ftuar në një emision në televizionin shtetëror rus, ai është pyetur për mundësinë e një lufte bërthamore, në vazhdën e përshkallëzimit të tensioneve midis Rusisë dhe Perëndimit për luftën në Ukrainë.
Në një video të shkurtër të shpërndarë në internet, intervistuesi Fyodor Lukyanov i thotë Putinit: “Ne u bëmë pak nervoz duke kujtuar komentet tuaja në këtë ngjarje katër vjet më parë se ‘të gjithë do të përfundojmë në parajsë’. Nuk e kemi me nxitim këtë apo jo?”
Presidenti rus qëndron i heshtur dhe hedh shikimin drejt publikut, duke bërë një pauzë rrëqethëse prej 10 sekondash. Intervistuesi e thyen tensionin duke thënë: “Ti po mendon. Kjo në vetvete është disi alarmante.”
Putini më pas përpiqet të bëjë një shaka për luftën bërthamore, duke buzëqeshur përpara se të shtojë: “Unë e bëra këtë me qëllim për t’ju alarmuar.”
Më pas ai qesh me vete, ndërsa prezantuesi dhe publiku qeshin me nervozizëm.
Në një nga paraqitjet e tij më të gjata publike që nga fillimi i pushtimit të tij më 24 shkurt, Putin pretendoi se bota po përballet me dekadën e saj më të rrezikshme që nga Lufta e Dytë Botërore, duke shtuar frikën.
/e.d
