Një operacion i policisë së Sarandës i koduar “Kraneja”, ka vënë në pranga dy persona të dyshuar për vjedhje në banesa.
Policia e Sarandës, gjatë operacionit ka goditur një tjetër rast në fushën e vjedhjeve dhe ka zbardhur dhe disa raste të ndodhura më parë.
Gjatë mëngjesit të sotëm u vunë në pranga M. B., 42 vjeç dhe E. K., 38 vjeç, banues në fshatin Gjashtë, Sarandë, në bashkëpunim me njëri-tjetrin, dyshohet se kanë vjedhur disa bagëti të imta të shtetasit E. M., Sarandë.
Me marrjen e njoftimit, shërbimet e policisë kanë organizuar punën dhe kanë shkuar menjëherë në vendin e ngjarjes, duke bërë të mundur identifikimin e autorëve, të cilët në momentin që kanë parë shërbimet e policisë kanë tentuar të largohen me shpejtësi me një motomjet, por janë kapur në flagrancë gjatë ndjekjes nga shërbimet e policisë.
Pas kontrollit të ushtruar policia u ka gjetur edhe një mjet prerës, i cili është sekuestruar në cilësinë e armës së ftohtë.
Gjithashtu, nga hetimet e kryera, dyshohet se të dyshuarit janë autorë të vjedhjeve së tre banesave në pronësi të shtetasve O. S., N. S. dhe A. K., në fshatin Krane, disa ditë më parë, ku dyshohet se kanë marrë orendi shtëpiake me vlerë rreth 120.000 lekë të reja.
Ndaj të dyshuarve materialet iu referuan Prokurorisë, për veprime të mëtejshme.
/a.r
